सोलुखुम्बुका युवा काँग्रेस नेताहरुद्वारा उर्जा मन्त्रालयमा ध्यानाकर्षण पत्र बुझाइयो

असार ३०, सोलुखुम्बु । सोलुखुम्बुमा विद्यमान गम्भीर विद्युत् समस्या समाधानका लागि नेपाली कांग्रेस सोलुखुम्बुका युवा नेताहरूले उर्जा, जलश्रोत तथा सिंचाइ मन्त्रालयमा ध्यानाकर्षण पत्र बुझाएका छन् । उक्त पत्रमार्फत जिल्लाभर विद्युत् आपूर्तिमा देखिएको असमानता र पूर्वाधारको अभावका कारण स्थानियहरू अन्धकारमा बस्न बाध्य भएको गुनासो गरिएको छ । यद्यपि सोलुखुम्बु जिल्ला जलविद्युत् उत्पादनको अपार सम्भावना बोकेको क्षेत्र हो र यहाँबाट उत्पादित विद्युत् नेपाल विद्युत् प्राधिकरणको केन्द्रीय प्रशारणमा जडान भई उल्लेखनीय योगदान दिएको छ । ध्यानाकर्षण पत्रमा अबिलम्ब सबस्टेशन, ट्रान्सफर्मर तथा अन्य आवश्यक भौतिक संरचनाहरू निर्माण गरी सञ्चालनमा ल्याउन माग गरिएको छ ।

हाल संचालनमा रहेको तिङ्ला लाममाने सबस्टेशन अन्तर्गतका विभिन्न फिडर लाइनहरू जसमा ५४ किलोमिटर लामो रमिते फिडर (सोलुदुधकुण्ड नगरपालिका र नेचासल्यान गाउँपालिका), ८५ किलोमिटर लामो बेलीडाँडा फिडर (सोलुदुधकुण्ड नगरपालिका वडा नं. ८, ९, १०), र ३४० किलोमिटर लामो दुधकोशी फिडर (थुलुङ दुधकोशी, सोताङ, महाकुलुङ र माप्य दुधकोशी)—लामो दुरीका कारण विद्युत् आपूर्तिमा समस्या आएको जनाइएको छ । त्यसैगरी, थुलुङ दुधकोशी–७, देउसा क्षेत्रमा ३३ के.भी. क्षमताको सबस्टेशन निर्माण गर्नुपर्ने माग राखिएको छ । साथै, पर्यटकीय दृष्टिले महत्वपूर्ण खुम्बु क्षेत्रमा केन्द्रीय प्रशारणमार्फत विद्युत् आपूर्ति सुनिश्चित गर्न खुम्बु पासाङल्हामु गाउँपालिकाको खरिखोला वा लुक्लामा पनि ३३ के.भी. सबस्टेशन निर्माण गर्न आग्रह गरिएको छ ।

अन्य मागहरूमा विभिन्न क्षेत्रमा ट्रान्सफर्मर, विद्युत् पोल तथा आवश्यक संरचना निर्माणको माग पनि समावेश गरिएको छ । ध्यानाकर्षण पत्र बुझाउने टोलीमा महासमिती सदस्य दुर्गा नौबाग,पार्टी जिल्ला उपसभापती घनराज सुनुवारसहित नेपाली कांग्रेस सोलुखुम्बुका नेताहरु नबिन थापा, दावागेलु पाख्रिन्, चन्द्र आचार्य,गिता गुरुङ्, बाबुराम आचार्य, कर्ण बिक,जिग्मे साङ्गे शेर्पा, प्रेम आचार्य र कैलाश केसी लगायतकाको उपस्थिति रहेको थियो ।