सोलुखुम्बुमा एक वर्षमा लडेर १० जनाको मृत्यु

साउन २७ गते, सोलुखुम्बु । हिमाली जिल्ला सोलुखुम्बुमा गएको आर्थिक वर्ष २०८१÷८२ मा लडेर १० जनाको मृत्यु भएको छ । जिल्ला प्रहरी कार्यालय सोलुखुम्बुका अनुसार तीन महिला र सात पुरुषको लडेर मृत्यु भएको हो ।

प्रहरी निरीक्षक एवंम सूचना अधिकारी विकास राईका अनुसार मेलापात, गाउँघर तथा छरछिमेकबाट रातको समयमा घर फर्कने क्रममा धेरैजसो मानिस लडेर ज्यान गुमाएका छन् । जाँड–रक्सी सेवन गरेर पैदल यात्रा गर्ने बानीले पनि दुर्घटना बढाएको बताइएको छ । घाँसदाउरा गर्न तथा पशु चराउन गएका ग्रामीणबासीहरू अचानक लडेर गम्भीर चोट लाग्ने वा मृत्यु हुने गरेको छ ।

दुर्घटनापछि दुर्गम क्षेत्रमा उद्धारमा ढिलाइ हुनाले मृतकको संख्या अझ बढिरहेको प्रहरी निरीक्षक राईले जानकारी दिनुभयो । ग्रामीण क्षेत्रमा सचेतना अभाव, जोखिमपूर्ण यात्रा र रातको समयमा असावधानीपूर्वक आवतजावतले यस्ता घटना बढेको प्रहरीको भनाइ छ ।