बसाइँसराई रोक्न काठमाण्डौ पुगेको खिजिदेम्बाले ९ सय नागरिकलाई सेवा दियो

साउन २८, सोलुखुम्बु । खिजिदेम्बा गाउँपालिकाले काठमाण्डौमा सुरु गरेको एकीकृत सेवा शिविरबाट झण्डै ९ सयले सेवा लिएका छन् । ससाना प्रशासनीक काम गर्न लामो दुरीको यात्रा तय गरेर स्थायी बसोबासस्थल सम्म पुग्नुपर्ने झण्झट कमगर्न बसाइँसराइ गर्ने बाध्यताको अन्त्य गर्न गाउँपालिकाले काठमाण्डौमा पुर्याएको रणनीतिक एकीकृत सेवा शिविरबाट ४ दिनमा उक्त ८ सय ९८ गाउँपालिकाबासीले सेवा लिएका हुन ।

ओखलढुङ्गा सदरमुकामबाट करिव साँडे २ घण्टा र काठमाण्डौबाट १ दिनको यात्रा गरेर पुगिने जिल्लाको सुदूर खिजीदेम्बा गाउँपालिकाले गत साउन २४ गतेबाट काठमाण्डौ स्थित चामुण्डा पार्टी प्यालेसमा सेवा लिएर गएको थियो । ९ वटा वडा रहेको गाउँपालिकाले सामान्य प्रशासनिक कामका लागी गाउँपालिका सम्म आउनुपर्ने नागरिकको बाध्यता अन्त्य गर्दै काठमाण्डामै गएर दिएको सेवाबाट ३ सय ६० जना लाभग्राही ले सामाजिक सुरक्षा भत्ताका नवीकरण गराएका छन् ।

यस्तै ८६ जोडीले विवाह दर्ता, १ सय २६ जनाले जन्मदर्ता, १२ जनाको मृत्यु दर्ता, १७ जनाले बसाइँसराई, १ सय १९ जनाले मालपोत भूमिकर सम्बन्धी सेवा लिएका छन् । यस्तै ७५ जनाले अन्य विविध सिफारिस, २ जोडीको सम्बन्ध विच्छेद र १ जनाको औषधी उपचार सम्बन्धी सेवा प्रवाह गरिएको छ । शिविरले गाउँपालिका बासीलाई हामी जहाँ छौँ त्यहाँ सरकार छ भन्ने आभास दिलाएको गाउँपालिका अध्यक्ष गम्बु शेर्पाले बताउनुभयो । उहाँले नागरिकले ५० रुपैयाँको सिफारिस लिन १० हजार बढी खर्च गर्नुपर्ने बाध्यताको अन्त्य शिविरले गरिदिएको उल्लेख गर्नुभयो । शिविरबाट गाउँपालिकाले करिव ७२ हजार रुपैयाँ आन्तरिक राजश्व असुल गरेको छ ।