पूर्व विद्यार्थी र दाताको सहयोगमा गार्मा माविको अक्षयकोषमा एक करोड नाघ्यो

साउन ३१, सोलुखुम्बु । विद्यालयको दीगो स्रोत व्यवस्थापनका लागि सोलुखुम्बुको सोलुदुधकुण्ड नगरपालिका ७ मा सञ्चालित गार्मा माध्यमिक विद्यालयले सुरु गरेको ‘करोड अक्षयकोष’ अभियान अन्तरगतको आर्थिक संकलनको लक्ष्य पूरा गरेको छ । २०७६ माघ महिनामा सुरु गरिएको करोड अक्षयकोष अभियानमा हालसम्म एक करोड ११ लाख ८४ हजार रुपैयाँ आर्थिक संकलन गरिएको वडाध्यक्ष तथा व्यवस्थापन समितिका अध्यक्ष सोनाम ग्याल्जेन शेर्पाले जानकारी दिनुभयो ।

यसमध्ये केही प्रतिबद्धता बमोजिमको रकम उठ्न बाँकी रहेको छ । आर्थिक संकलन कार्य मूल समितिका संयोजक सार्की लामाको नेतृत्वमा देश विदेशमा रहेका विद्यालयका पूर्व विद्यार्थीहरु तथा सहयोगीदाताहरुले अक्षयकोषका लागि रकम सहयोग गरेका छन् । गार्मा शेर्पा किदुक छोक्पा अमेरिका लगायत अभियानमा सहयोग गर्नुहुने सम्पूर्ण दाताहरुलाई संयोजक लामाले धन्यवाद व्यक्त गर्नुभएको छ । कोषको व्याज रकमलाई विद्यालय व्यवस्थापन र गुणस्तरिय शिक्षा प्रदानमा खर्च गर्दै जाने संयोजक लामाले बताउनुभयो । पूर्व प्रध्यानाध्यापक समेत रहेका लामाले अक्षयकोष विद्यालयको दीगो स्रोत हुने भएकाले गार्मा माविलाई जिल्लाकै नमूना विद्यालयमा स्थापित गर्न मेरुदण्डको काम गर्ने विश्वास लिनुभएको छ ।

शैक्षिक उन्नयनको लागि दीगो स्रोत व्यवस्थापनको उद्देश्य राखेर सुरु गरिएको अभियानमा करिब सय जना दाताहरु जोडिएका छन् । अभियानमा ५० हजार देखि २ लाख ५० हजार रुपैयाँ सम्म सहयोग जुटेको आर्थिक संकलन मूल समिति सदस्य कर्मा शेर्पाले जानकारी दिनुभयो । अक्षयकोषमा रकम जम्मा गर्ने दाताहरुलाई छिट्टै औपचारिक कार्यक्रम मार्फत धन्यवाद ज्ञापन गर्ने र विद्यालयले अक्षयकोष सञ्चालन कार्यविधि तयार गरी शैक्षिक उन्नयनमा अघि बढ्ने वडाध्यक्ष तथा व्यवस्थापन समितिका अध्यक्ष सोनाम ग्याल्जेन शेर्पाले बताउनुभयो । विद्यालय व्यवस्थापन समिति र विद्यालय प्रशासनको कुशल नेतृत्वलाई विश्वास गरेर दाताहरुले स्वस्फुर्त रुपमा सहयोग रकम उपलब्ध गराएका थिए ।

जिल्लाकै अग्रणी विद्यालयको छवि बनाएको गार्मा माविले ’कृषि तर्फ बाली विज्ञान, विज्ञान संकाय र अग्रेजी माध्यम’मा पठनपाठन गर्दै आएको छ । ५६० विद्यार्थी अध्ययनरत रहेको विद्यालयले ’सुस्त श्रवण कक्षा’ र ’निःशुल्क होस्टेल’ सञ्चालन गर्दै आएको छ । सोलुखुम्बु, खोटाङ, ओखलढुंगा लगायत जिल्लाका सय जना भन्दा बढी विद्यार्थीले निःशुल्क होस्टेल सुविधा लिदै आएका छन् ।