सोलुखुम्बुमा अझैपनि २२ हजारले गर्छन खाना पकाउनमा दाउराको प्रयोग

जेठ २०, सोलुखुम्बु ।  हिमाली जिल्ला सोलुखुम्बुमा खाना पकाउने इन्धनको रुपमा दाउराको प्रयोग गर्ने घरधुरी संख्या बढी देखीएको छ ।  राष्ट्रिय जनगणना २०७८ अनुसार जिल्लामा इन्धनको रुपमा दाउरा प्रयोग गर्ने घरधुरीको संख्या अन्य इन्धन प्रयोगकर्ताहरूको तुलनामा भारी अङ्कले अगाडि देखाएको हो ।

जनगणनामा गरिएको घरधुरी सर्वेक्षणका अनुसार जिल्लामा इन्धनको प्रयोग गर्ने जम्मा घरधुरी २६ हजार २ सय ३९ मध्ये दाउराको प्रयोग गर्ने घरधुरी सबैभन्दा धेरै २१ हजार ७ सय ८५ देखिएको छ । आधुनिक युगमा ग्याँस, विद्युतीय चुल्हो लगायत प्रयोगको संख्या बढिरहेका बेला सोलुखुम्बुमा भने दाउरालाई इन्धनको रुपमा प्रयोग गर्नेको संख्या नघटेको पाइएको छ ।  

जिल्लामा हाल पनि ग्याँसलाई इन्धनको रुपमा प्रयोग गर्नेको संख्या घरधुरीका हिसाबले ३ हजार ९ सय ४५ मात्र रहेको छ । यस्तै जलविद्युतको प्रचुर सम्भावना रहेको जिल्ला सोलुखुम्बुमा विद्युतलाई इन्धनको रुपमा प्रयोग गर्ने घर धुरीसंख्या एकदमै न्युन पाइएको छ ।  यहाँ विद्युतलाई इन्धनको रुपमा प्रयोग गर्ने जम्मा घरधुरी ३ सय मात्र रहेको पाइएको हो ।

यस्तै जिल्लामा गुइँठालाई इन्धनको रुपमा प्रयोग गर्ने संख्या १ घरधुरी, बायो ग्याँसलाइ इन्धनको रुपमा प्रयोग गर्ने ५६, मट्टितेलको प्रयोग गर्ने ५१ र अन्य प्रयोग गर्ने १ घर धुरी रहेको देखिएको छ ।  तुलनात्मक रुपमा सबभन्दा बढी इन्धनको रुपमा विद्युत प्रयोग गर्ने घरधुरी संख्या खुम्बु पासाङ ल्हामु गाउँपालिकामा पाइएको छ ।  

उक्त गाउँपालिकामा ३ सय ८५ घरधुरीले विद्युतलाई इन्धनको रुपमा प्रयोग गर्ने गरेका छन भने जिल्लाको एक मात्र नगरपालिका तथा विद्युतको प्रत्यक्ष पहुँच रहेको सोलुदुधकुण्ड नगरपालिकामा ९ घरधुरीमात्रै विद्युतलाई इन्धनको रुपमा प्रयोग गर्ने गरेको पाइएको छ ।