ममताको अचारको लोकप्रियता बढ्दै, एक हप्तामै वेचिन ३५ बट्टा

जेठ २०, सोलुखुम्बु । सोलुखुम्बुको सोताङ गाउँपालिकाकाको वडा नम्बर २ पावै की ममता खालिङले बनाएको अचारको माग दिनप्रतिदिन बढ्दै गएको छ  । गत बैशाखमा तालिम लिएर अचार बनाउन सुरु गरेकी ममताको अहिले दैनिकी ने अचार बनाउने र बेच्ने बनेको हो । आफ्नै करेसाबारीमा फलेको तरकारी र अन्य सब्जी को अचार बनाएर उनी एक आत्मनिर्भर महिला बनेकी छन ।

अहिले उनले बनाएको अचारको माग अत्याधिक बढ्दै गएको उनि बताउँछिन् । गत बैशाखमा गाउँपालिकाले सञ्चालन गरेको गरिब सँग विश्वेश्वर कार्यक्रममार्फत अचार बनाउने तालिम लिएकी ममताले अहिले आफ्नै करेसाबारीमा उत्पादन भएका अकबरे खोर्सानी, मेथी मुला, गाँजर लगायत वफ (मासु) को अचार बनाउन थालेकी छिन ।

उनलाई पछिल्लो २ हप्ता यता अचार बनाएर फुर्सद नै नभएको सुनाउँछिन् ।  उनले बनाएको अचार स्थानीय बजारमा निकै रुचाइएको छ ।  अहिले उनी घरमै ४ प्रकारको अचार बनाएर स्थानीय बजारमा बिक्री गर्दै आएकी छिन । ममताले अचार बनाउन थालेको यो २ हप्तामा ३५ बट्टा उत्पादन गरेर झण्डै १० हजारको अचार स्थानीय बजारमा बिक्री गरिसकेकी छन ।  

अहिले उनले बनाएको अचारको माग स्थानीय बजारबाट मात्रै हैन जिल्लाका बिभिन्न स्थानबाट फोन मार्फत पनि आउन थालेको छ ।  उनी भन्छिन् “मैले तालिम लिदा व्यवसायिक बन्छु भनेर लिएकी थिए, अहिले त्यही गर्दैछु ” ।   गाउँपालिकाले नागरिकहरूलाई विभिन्न कार्यक्रमहरू मार्फत तालिम तथा सीप हस्तान्तरणका काम गरिरहेको गाउँपालिका अध्यक्ष खिलराज बस्नेतको भनाई छ ।  

उहाँले हाल सम्म गाउँपालिकाको वडा नम्बर १ र २ का गरि ४० जनालाई अचार बनाउने तालिम दिइसकेको बताउनुभयो ।