नेपाल शिक्षक महासंघ सोलुखुम्बुले सम्पन्न गर्यो आठ वटै पालिकामा धर्ना कार्यक्रम

भदौ १३, सोलुखुम्बु । नेपाल शिक्षक महासंघ जिल्ला कार्यसमिति सोलुखुम्बुले शिक्षा ऐनको कार्यान्वयन र शिक्षकका हकहितको माग गर्दै जिल्लाका आठवटै स्थानीय तहमा एकसाथ धर्ना कार्यक्रम सम्पन्न गरेको छ । शुक्रबार सम्पन्न सो कार्यक्रममार्फत महासंघले विगतमा सरकारसँग भएका सम्झौता कार्यान्वयन नभएकोप्रति गम्भीर असन्तुष्टि जनाउँदै पुनः दबाबमूलक आन्दोलन थालेको जनाएको छ ।

नेपाल शिक्षक महासंघ जिल्ला अध्यक्ष जनक कुमार थापाका अनुसार शैक्षिक गुणस्तर अभिवृद्धि, शिक्षकको हकअधिकार र पेशागत सुरक्षालाई सुनिश्चित गर्न स्थानीय तहमा दुई घण्टा शान्तिपूर्ण धर्ना कार्यक्रम आयोजना गरिएको हो । धर्नासँगै सम्बन्धित स्थानीय तहलाई ध्यानाकर्षण पत्र समेत बुझाइएको उहाँले जानकारी दिनुभयो । धर्ना कार्यक्रम आठै पालिकामा स्थानीय शिक्षक महासंघ समितिको समन्वयमा, ब्यानरसहित शान्तिपूर्ण रूपमा सम्पन्न भएको थियो ।

कार्यक्रममा पालिकास्तरका महासंघ प्रतिनिधि, सरोकारवाला संघसंस्था तथा शिक्षकहरूको उल्लेख्य सहभागिता रहेको थियो । महासंघले शिक्षा ऐन यथाशीघ्र जारी गर्न, विगतका सम्झौता कार्यान्वयन गर्न तथा शिक्षकको सामाजिक सुरक्षा र पेशागत अधिकार सुनिश्चित गर्न सरकारलाई बारम्बार ध्यानाकर्षण गराउँदै आएको छ ।