गत वर्ष सगरमाथा आरोहणबाट ५५ करोडभन्दा बढी राजस्व सकंलन

भदौ १७, सोलुखुम्बु । गत वर्ष विश्वको सर्वोच्च शिखर सगरमाथा आरोहणबाट ५५ करोडभन्दा बढी राजस्व सकंलन गरिएको छ । पर्यटन विभागका अनुसार २०८१ सालको वसन्त आरोहण सिजनमा ५५ करोड ४९ लाख ९० हजार २७८ राजस्व सकंलन गराएको हो । गत वर्ष सगरमाथा आरोहण गर्नेको सख्यां ३७४ रहेको थियो । तीमध्ये ३०२ जना पुरुष र ७२ जना महिला रहेका छन् ।

सगरमाथा आरोहण अनुमति शुल्कमार्फत संकलित यो राजस्व नेपालका लागि महत्त्वपूर्ण विदेशी मुद्राको स्रोत मानिन्छ । विश्वभरका साहसिक पर्यटकहरूका लागि सगरमाथा एक प्रमुख गन्तव्य रहँदै आएको छ ।

पर्यटक तथा आरोहीहरूबाट प्राप्त राजस्वले हिमाली पर्यटन क्षेत्रको विकासमा टेवा पुग्ने विश्वास गरिएको छ । सरकारले वातावरणीय संरक्षण, सुरक्षित आरोहण व्यवस्थापन, र हिमाली क्षेत्रमा पूर्वाधार विकासका लागि उक्त राजस्वको उपयोग गर्ने जनाएको छ ।