सोलुखुम्बुमा कर्फ्यूले व्यवसायीहरू मर्कामा, दशैको व्यापार प्रभावित

भदौ २६, सोलुखुम्बु । सोलुखुम्बुमा जारी गरिएको कर्फ्यू आदेशले स्थानीय व्यवसायीहरू गम्भीर प्रभावित भएका छन् । दशैंको मुखमा व्यापार बढ्ने आशामा रहेका व्यापारीहरू अचानकको निषेधाज्ञाले ठूलो संकटमा परेका हुन् । सल्लेरीका व्यवसायी संजय पञ्जियारले कर्फ्यू सुरु भएपछि बजार पूरै बन्द भएको भन्दै ग्राहकको आवागमन शून्यप्रायः भएको बताउनुभयो । दशैंअघि सामान भित्र्याएर बिक्रीको तयारी गरेको तर अब लगानी डुब्ने खतरा देखिएको पञ्जियारले गुनासो गर्नुभएको छ ।

देशव्यापी जेनजी आन्दोलनका क्रममा सिर्जित असहज परिस्थितिलाई मध्यनजर गर्दै जिल्ला प्रशासन कार्यालयले बुधबार दिउँसोदेखि कर्फ्यू आदेश जारी गरेको हो । स्थानीय प्रशासन ऐन २०२८ को दफा ६ बमोजिम जारी गरिएको आदेशले जिल्लाभित्र र्याली, जुलुस, सभा, प्रदर्शन, बैठक तथा कुनैपनि जमघट गर्न पूर्ण प्रतिबन्ध लगाएको छ । यता सदरमुकाम सल्लेरीका अर्का व्यापारी निरकुमार नेपालीले दशैं आउन लाग्दा व्यापार व्यवसायमा केही राहत हुने तर कर्फ्यूले थप समस्यामा पारेको बताउनुभयो ।

कर्फ्यू अवधिभर सबै प्रकारका पसलहरू पूर्ण रूपमा बन्द गरिएको छ, भने सवारी आवागमनमा पनि कडाइ गरिएको छ । यद्यपि, एम्बुलेन्स, दमकल, स्वास्थ्यकर्मी, सञ्चारकर्मी, पर्यटन क्षेत्रसँग सम्बन्धित सवारी, मानव अधिकारकर्मी तथा कूटनीतिक नियोगका सवारी साधनहरूलाई सुरक्षाकर्मीको सहजीकरणमा सञ्चालन गर्न दिइएको छ । प्रमुख जिल्ला अधिकारी लिला के.सी पाण्डेका अनुसार, सार्वजनिक सुरक्षालाई ध्यानमा राख्दै नेपाल प्रहरी र सशस्त्र प्रहरी बल परिचालन गरिएको छ, र कर्फ्यू आदेशको उल्लंघन भएमा कानून बमोजिम कडाइका साथ कारबाही गरिनेछ ।