सोलुखुम्बुमा कृषि पढ्दै १८३ विद्यार्थी, बढ्दैछ प्राविधिक शिक्षाप्रति आकर्षण

सबिना राई, असोज ११, सोलुखुम्बु । हिमाली जिल्ला सोलुखुम्बुका तीन वटा विद्यालयमा कृषि प्राविधिक शिक्षा अध्ययन हुने गरेको छ । जिल्लाका विभिन्न स्थानीय तहमा सञ्चालित ती विद्यालयमा कक्षा ९ देखि १२ सम्म करिब १८३ विद्यार्थीले कृषि प्राविधिक शिक्षा अध्ययन गरिरहेका छन् । सोताङ गाउँपालिकास्थित वीरेन्द्र ज्योति माध्यमिक विद्यालयमा सबैभन्दा बढी ८० विद्यार्थी कृषि प्राविधिक धारमा अध्ययनरत छन् ।

यस्तै, लिखुपिके गाउँपालिकास्थित हिमगंगा माध्यमिक विद्यालयमा करिब ५५ र सोलुदूधकुण्ड नगरपालिका–७ स्थित गार्मा माध्यमिक विद्यालयमा ४५ विद्यार्थी अध्ययनरत रहेको सम्बन्धित विद्यालयले जनाएका छन् । विद्यालयका अनुसार कृषि प्राविधिक शिक्षा सुरु भएपछि स्थानीयस्तरमै व्यावहारिक ज्ञान तथा सीप हासिल गर्ने अवसर विद्यार्थीले पाएका छन् । परम्परागत रूपमा कृषिमा निर्भर परिवारका विद्यार्थीका लागि आधुनिक कृषि प्रविधि, उत्पादन प्रणाली तथा व्यावसायिक कृषि सम्बन्धी ज्ञान उपयोगी हुने विद्यालयको भनाइ छ । विद्यालयमा कृषि प्राविधिक शिक्षा अध्ययन गर्ने विद्यार्थीको आकर्षण क्रमशः बढ्दै गएको शिक्षकहरू बताउँछन् ।

सैद्धान्तिक शिक्षासँगै प्रयोगात्मक अभ्यास हुने भएकाले विद्यार्थीलाई कृषि विषयप्रति रुचि बढाउन सहयोग पुगेको उनीहरूको भनाइ छ । स्थानीय तहमा कृषि उत्पादन तथा पशुपालनलाई व्यावसायिक बनाउन खोजिएका कारण पनि कृषि प्राविधिक जनशक्तिको आवश्यकता बढ्दै गएको छ । विद्यालय तहबाटै कृषि सम्बन्धी प्राविधिक ज्ञान हासिल गरेका विद्यार्थीले आफ्नै गाउँठाउँमा कृषि उद्यम सञ्चालन गर्न सक्ने सम्भावना रहेको शिक्षकहरू बताउँछन् । कृषि प्राविधिक शिक्षा पूरा गरेपछि विद्यार्थीमध्ये केही उच्च शिक्षा अध्ययनका लागि कृषि तथा सम्बन्धित विषयतर्फ जाने गरेका छन् । केही विद्यार्थीले भने सीपलाई व्यवहारमा प्रयोग गर्दै कृषि तथा पशुपालनसम्बन्धी काममा जोडिने गरेका विद्यालयहरूले जनाएका छन् ।

तर, विद्यालय तहको कृषि प्राविधिक शिक्षाबाट उच्च शिक्षासम्मको बाटो सहज बनाउन आवश्यक पूर्वाधार, प्रयोगशाला, दक्ष जनशक्ति तथा छात्रवृत्तिको व्यवस्था अझ प्रभावकारी बनाउनुपर्ने आवश्यकता देखिएको छ । सोलुखुम्बुमा कृषि प्राविधिक शिक्षाको भविष्य स्थानीय आवश्यकता र सम्भावनासँग जोडिएको शिक्षकहरूको बुझाइ छ । जिल्लामा तरकारी, फलफूल, आलु, पशुपालन तथा अन्य कृषि उत्पादनको सम्भावना रहेकाले प्राविधिक जनशक्ति उत्पादन गर्न सके स्थानीय कृषि क्षेत्रलाई व्यावसायिक बनाउन सहयोग पुग्ने अपेक्षा गरिएको छ ।