सोलुखुम्बुको मौसम क्रमिक रूपमा सुधार हुँदै

असोज १२, सोलुखुम्बु । लगातारको वर्षापछि सोलुखुम्बुको मौसम क्रमिक रूपमा सुधार हुँदै गएको छ। सोमबार बिहानैदेखि जिल्लाका अधिकांश क्षेत्रमा घाम लागेको छ। मौसम पूर्वानुमान महाशाखाका अनुसार सोमबार दिउँसो सोलुखुम्बुसहित देशभर आंशिक बदली रहनेछ।

हिमाली तथा पहाडी भू–भागका थोरै स्थानमा मेघगर्जन र चट्याङसहित मध्यमसम्म वर्षा तथा हिमपातको सम्भावना रहेको महाशाखाले जनाएको छ। सोलुखुम्बुमा पछिल्ला दिनमा निरन्तर वर्षा हुँदा सडक तथा यातायातमा समेत असर परेको थियो। वर्षा कम हुँदै गएसँगै जिल्लाको जनजीवनसमेत क्रमशः सहज बन्दै जाने अपेक्षा गरिएको छ।

महाशाखाका अनुसार सोमबार राति पनि हिमाली तथा पहाडी भू–भागमा आंशिक बदली रहनेछ। ती क्षेत्रका एक–दुई स्थानमा मध्यमसम्म वर्षा तथा हिमपातको सम्भावना रहे पनि समग्रमा मौसम क्रमिक रूपमा सुधार हुँदै जाने पूर्वानुमान गरिएको छ।देशका अन्य क्षेत्रमा भने दिउँसो कोशी, मधेश, बागमती, गण्डकी र लुम्बिनी प्रदेशका तराई भू–भागका एक–दुई स्थान तथा सुदूरपश्चिम प्रदेशको तराईका थोरै स्थानमा मेघगर्जन र चट्याङसहित मध्यमसम्म वर्षा हुन सक्ने जनाइएको छ।

राति सुदूरपश्चिम र लुम्बिनी प्रदेशको तराईसहित हिमाली तथा पहाडी भू–भागमा आंशिक बदली रहने तथा बाँकी तराई क्षेत्रमा मौसम मुख्यतया सफा रहने महाशाखाको पूर्वानुमान छ।