लिखुपिकेमा सञ्चालन हुन लागेको आँखा शिविर अनिश्चितकालका लागि स्थगित

भदौ २६, सोलुखुम्बु । सोलुखुम्बुको लिखुपिके गाउँपालिकामा सञ्चालन हुन लागेको आँखा शिविर अनिश्चितकालका लागि स्थगित गरिएको छ । जिल्ला सामुदायिक आँखा केन्द्र फाप्लु, तिलगंगा आँखा अस्पताल, प्रतिष्ठान काठमाडौं र क्युर द ब्याइन्डनेस प्रोजेक्टको सहकार्यमा भदौ २९ गते आयोजना गर्न लागिएको १ दिने आँखा शिविर हालका लागि स्थगित गरिएको हो ।

हाल देशभर जनजी आन्दोलनका कारण सिर्जित असहज परिस्थितिलाई ध्यानमा राख्दै सेवा स्थगित गर्नुपरेको गाउँपालिकाका अध्यक्ष मिना कार्की बस्नेतले बताउनुभयो । जिल्ला प्रशासन कार्यालयले जिल्लाका मुख्य क्षेत्रहरूमा कफ्र्यु आदेश जारी गरेपछि आँखा शिविर सञ्चालन गर्न असम्भव भएको गाउँपालिकाले जनाएको छ ।

स्थगित गरिएको शिविर अर्को सूचना प्रकाशित नभएसम्मका लागि स्थगित गरिएको भन्दै अध्यक्ष बस्नेतले सेवा पुनः सञ्चालनको बारेमा यथासमयमा जानकारी गराइने बताउनुभयो । यस निर्णयले गाउँपालिका तथा आसपासका बासिन्दालाई तत्काल आँखा जाँच सेवा उपलब्ध गराउन नसकिए पनि, परिस्थिती सामान्य भएपछि सेवा सुचारु गरिने जनाइएको छ ।