भदौ २९, आइतबार । २१ औँ केदार स्कुल हत्याकाण्ड स्मृति दिवस एवं २३ औँ शहीद कोमल स्मृति दिवसको सम्झनामा दिपप्रज्वलन गरिएको छ । सोलुखुम्बुको नेचासल्यान गाउँपालिकामा दीप प्रज्वलन तथा श्रध्दान्जी कार्यक्रम आयोजना तथा गत २३ र २४ भाद्रमा जेन जी आन्दोलनका क्रममा ज्यान गुमाएका सहिदहरु प्रती श्रद्धान्जली अर्पण गरिएको छ । सहिद कोमल कट्टेलका परिवार कमलप्रसाद कटेल र पुण्य कटेलको उपस्थितिमा कार्यक्रम आयोजना गरिएको जनाइएको छ ।
केदार स्कुल ह्त्याकाण्डका रुपमा चर्चित घटना २०६१ भाद्र २९ गतेका दिन नेचासल्यान गाउँपालिका –४ स्थित केदार मा.वि.को प्राङ्गणमा अखिल (क्रान्तिकारी) सोलुखुम्बुका तत्कालिन संयोजक भुपेन्द्र कार्की ’अजय’, सचिव उर्मिला राई ’क्रान्ति’, सदस्यहरू तिलकुमारी गिरी ’आस्था’ , आइकम राई ’रविन’ र पेम्बा शेर्पा सहित ५ जनाको विद्यालयको प्राङ्गणमा हत्या भएको थियो । यस्तै २०५९ असार १७ गते नेलेबाट गिरफ्तार गरी ३ महिना बढी सोलुखुम्बुको हिरासतमा राखेर ओखलढुंगा हिरासत स्थानान्तरण गर्ने क्रममा २०५९ भाद्र २९ गते हालको सोलुदुधकुण्ड ८ स्थित पत्तालेको थाले डाँडामा रमेश कट्टेल ’कोमल’ को हत्या भएको थियो ।
त्यसै गरी २०८२ भाद्र २३ र २४ गते भएको जेन जेड पुस्ताको आन्दोलनमा ज्यान गुमाएका श्रीयम चौलागाईं लगायतका ५९ जना शहीदहरूको परिवारमा समवेदना एवं ज्यान गुमाएकाहरू प्रती श्रद्धाञ्जली अर्पण गरिएको छ । दीप प्रज्वलन तथा श्रद्धाञ्जली कार्यक्रमलाई प्रतिष्ठान अध्यक्ष लोकेन्द्र आर.सी, नेचासल्यान गाउँपालिका वडा नम्बर ३ का अध्यक्ष एवं माओवादी नेता सीताराम भट्टराई साथै शहीद परिवारका तर्फबाट कमलप्रसाद कटेल लगायतले श्रद्धाञ्जली मन्तव्य राख्नुभएको थियो । कार्यक्रममा शहीद परिवार , शुभेच्छुक, शुभचिन्तकहरू उपस्थिति रहेको थियो ।
Discussion about this post