नेपाल पर्यटनका लागि पूर्ण रूपमा खुला र सुरक्षित भएको टानको घोषणा

भदौ २९, सोलुखुम्बु । ट्रेकिङ एजेन्सिज एशोसिएसन अफ नेपाल (टान) ले नेपाल पुनः सामान्य अवस्थामा फर्किएको र देशभर पर्यटन सेवा सहज रूपमा सञ्चालनमा रहेको स्पष्ट पारेको छ । हालैका दिनमा उत्पन्न अस्थिरता पछि देशभरको जनजीवन सामान्य बन्दै गएको टानले जनाएको छ । टानका कार्यबाहक अध्यक्ष कर्मा शेर्पाले जारी गरेको प्रेस विज्ञप्तिमा, जेन–जेड आन्दोलनका क्रममा ज्यान गुमाउनेप्रति गहिरो समवेदना व्यक्त गर्दै घाइतेहरूको शीघ्र स्वास्थ्यलाभको कामना गरिएको छ ।

त्यस्तै, आन्दोलनका क्रममा सार्वजनिक र निजी सम्पत्तिमा—विशेषगरी पर्यटकीय पूर्वाधारहरूमा भएको क्षतिको गम्भीर चिन्ता पनि व्यक्त गरिएको छ । विज्ञप्तिमा उल्लेख गरिएअनुसार, हाल नेपालका प्रमुख पर्यटकीय गन्तव्यहरू तथा ट्रेकिङ मार्गहरू पूर्ण रूपमा खुला छन् । होटल, रेस्टुरेन्ट, यातायात सेवा, हवाई यात्रा र ट्रेकिङ सम्बन्धी सम्पूर्ण सेवा सुचारु भइसकेका छन् । स्थानीय समुदायहरू पनि पर्यटकहरूलाई स्वागत गर्न उत्साहित रहेको जनाइएको छ ।

टानले नेपालको पहिलो महिला प्रधानमन्त्री सुशिला कार्कीलाई बधाई ज्ञापन गर्दै सफल कार्यकालको शुभकामना दिएको छ । प्रधानमन्त्री परिवर्तनसँगै देशमा स्थायित्व र विश्वसनीयता कायम हुने विश्वास व्यक्त गरिएको छ । विज्ञप्तिमा नेपालको प्राकृतिक सौन्दर्य, सांस्कृतिक विविधता र हिमाली साहसिक गतिविधिहरूको आनन्द लिन विश्वभरका पर्यटकहरूलाई नेपाल भ्रमणको निम्तो दिइएको छ ।

साथै, सामान्य अवस्था पुनःस्थापना गर्न सघाउने सम्पूर्ण साझेदारहरू नेपाल सरकार, नेपाल पर्यटन बोर्ड, पर्यटन व्यवसायीहरू र अन्य निकायप्रति आभार प्रकट गरिएको छ । टानले अन्त्यमा नेपाल सुरक्षित, शान्तिपूर्ण र पर्यटक मैत्री देश भएको पुनः पुष्टि गर्दै सबैलाई अतुलनीय अनुभवको हिस्सा बन्न आमन्त्रण गरेको छ ।