भदौ २९, आइतबार । सोलुखुम्बुको सोलुदुधकुण्ड नगरपालिका वडा नम्बर २ का नागरिकलाई विद्युतीय चुल्हो वितरण गरिएको छ । नगरपालिकाका प्रमुख नाम्गेल जाङबु शेर्पाको प्रमुख आतिथ्यता एवं वडा अध्यक्ष ङवाङ ठिले शेर्पाको सभापतित्वमा भएको एक कार्यक्रमका बीच वडाबासीलाई विद्युतीय चुल्हो वितरण गरिएको हो । धुवाँको कारण वडाबासीले स्वास्थ्य समस्या भोगिरहनुपरेको भन्दै विद्युतीय चुल्होले नागरिकको स्वास्थ्य बचाउनुका साथै वाताबरण संरक्षणमा समेत महत्वपुर्ण योगदान दिने भएकाले यस्तो कार्यक्रम नगरपालिकाले अघि सारेको मेयर नाम्गेल जाङ्बु शेर्पाले बताउनुभयो ।
दाउरा बालेर खाना पकाउँदै आएका वडाबासीलाई वडाका ३ सय ५० घरधुरीलाई विद्युतिय चुल्हो र कुकर वितरण गरिएको छ । वडाको वार्षिक कार्यक्रम मार्फत नै चुल्हो वितरण गरिएको मेयर शेर्पाले बताउनुभयो । उहाँले यस अघि नगरपालिकाले अनुदानमा वितरण गरेको कृषि जन्य सामाग्रीहरूको वडाबासीले संरक्षण गरेर सञ्चालन गरिरहेकोमा खुसी व्यक्त गर्दै विद्युतीय चुल्होले ग्यास चुल्होको परनिर्भरतालाई कम गर्ने उल्लेख गर्नुभयो । उहाँले जलश्राेतको धनी जिल्लामा विद्युत खपतलाई समेत बढाउने भएकादले चुल्हो निकै उपयोगी भएको उल्लेख गर्नुभयो । उहाँले आफू नेतृत्वमा आइसकेपछि नगरपालिकाको मुहरा फेर्न हरप्रयास गरिरहेको उल्लेख गर्नुभएको थियो ।
कार्यक्रम बोल्दै नगरपालिकाका उपप्रमुख गान्धीमाया तामाङले वडाबासी महिलाहरूको खाना पकाउँदा जाने समयको बचत हुने भन्दै बधाई व्यक्त गर्नुभयो । उहाँले कृषि, शिक्षा स्वास्थ्य, विद्युत लगायतका क्षेत्रमा वडाले निकै फड्को मारिसकेको उल्लेख गर्दै वडाबासीलाई बधाई दिनुभयो ।
कार्यक्रमका सभापती तथा वडा नम्बर २ का अध्यक्ष ङवाङ ठिले शेर्पाले वडाबासी नागरिकमा घरभित्रको धुवाँका कारण हुने स्वास्थ्य समस्या र वाताबणीय प्रभाव कम गर्न चुल्होले महत्वपुर्ण भुमिका खेल्ने दावी गर्नुभयो ।
यस्तै नगरपालिकाको वडा नम्बर ६ का अध्यक्ष फुर्वा ग्याल्जेन शेर्पाले नगरपालिकाले समग्र पालिका भित्र विभिन्न क्षेत्रमा महत्वपुर्ण काम गरिरहेको उल्लेख गर्दै यसका लागी नगरका प्रमुख नाम्गेल जाङबु शेर्पाको नेतृत्व क्षमताको प्रशंसा गर्नुभएको थियो ।
चुल्हो र खाना पकाउने कुकर प्राप्तगरेपछि यहाँका नागरिकहरूले वडा र नगरले सम्भाव्य वातावरणसँग सम्बन्धित समस्या र स्वास्थ्य समस्याहरूबाट आफूहरू जोगिने आशा व्यक्त गरेका छन् ।
Discussion about this post