ऐसेलुखर्क गाउँपालिकामा राष्ट्रिय परिचयपत्र दर्ता सवस्टेशनबाट सेवा प्रदान गरिदैँ

भदौ ३१, सोलुखुम्बु । खोटाङको ऐसेलुखर्क गाउँपालिकामा राष्ट्रिय परिचयपत्र दर्ता सवस्टेशनमार्फत सेवा प्रदान गरिने भएको छ । जिल्ला प्रशासन कार्यालय खोटाङ र गाउँपालिकाको समन्वय तथा सहकार्यमा पालिकाभित्र स्थायी रूपमा बसोबास गर्दै आएका अपाङ्ग, अशक्त, जेष्ठ नागरिकलगायत राष्ट्रिय परिचयपत्र छुट भएका नागरिकहरूलाई लक्षित गरी यो सेवा सुरु गरिएको हो ।

गाउँपालिकाले सार्वजनिक सूचना मार्फत जानकारी दिँदै असोज ३ गते वडा नम्बर १, २ र ३ का नागरिकहरूलाई लक्षित गरी गाउँपालिकाको प्रशासनिक भवनबाट सेवा प्रवाह गरिने जनाएको छ । त्यस्तै, असोज ४ गते वडा नम्बर ४, ५, ६ र ७ का नागरिकहरूका लागि सेवा सञ्चालन गरिनेछ ।

गाउँपालिकाका प्रमुख प्रशासकीय अधिकृत रेख बहादुर थापाका अनुसार, असोज ३ गते सेवा बिहान ८ बजे देखि बेलुका ६ बजेसम्म सञ्चालन हुनेछ भने असोज ४ गते बिहान ९ बजे देखि दिउँसो ५ बजेसम्म सेवा उपलब्ध हुनेछ । गाउँपालिकाले सेवा लिने नागरिकहरूलाई आवश्यक कागजातहरू सहित तोकिएको मितिमा समयमै उपस्थित हुन आग्रह गरेको छ ।

स्थानीय सरकारको यो पहलले विशेषगरी पहुँचविहीन तथा दर्ताबाट छुट भएका समुदायका नागरिकहरूलाई परिचयपत्र प्राप्त गर्न सहज हुने विश्वास गरिएको छ ।