थुलुङ दुधकोशीको समावेशी पहल : माझि विद्यार्थीलाई १० हजार नगदसहित शैक्षिक सामग्री वितरण

भदौ ३१, मंगलबार । सोलुखुम्बको थुलुङ दुधकोशी गाउँपालिकाले माझि समुदायका विद्यार्थीहरूलाई लक्षित गर्दै नगदसहित शैक्षिक सामग्री वितरण गरेको छ । गाउँपालिकाले “समावेशी नीति, लक्षित कार्यक्रम र सहभागितामूलक निर्णय प्रक्रिया” लाई आत्मसात् गर्दै, सीमान्तकृत माझि समुदायको संरक्षण र प्रवद्र्धन गर्ने उद्देश्यले शैक्षिक सामग्री वितरण गरेको हो ।

मंगलबार एक विशेष समारोहबीच गाउँपालिका अध्यक्ष असिमलाईले सम्पूर्ण माझि समुदायका विद्यार्थीहरूलाई जनही १० हजार नगद र शैक्षिक सामग्री हस्तान्तरण गर्नुभएको छ । शैक्षिक सहयोग प्राप्त गरेपछि माझि समुदायका विद्यार्थीहरूमा शिक्षाप्रति उत्साह थपिएको र अभिभावकहरू पनि निकै खुसी देखिएका छन् ।

गाउँपालिकाले आगामी दिनमा पनि सीमान्तकृत समुदायका बालबालिकालाई प्राथमिकता दिँदै शिक्षाको पहुँच सुनिश्चित गर्ने प्रतिबद्धता जनाएको छ । कार्यक्रममा पालिका अध्यक्षसहित जनप्रतिनिधि, शिक्षक, अभिभावक र विद्यार्थीहरूको उपस्थिति रहेको थियो ।