सोलुखुम्बुमा सुकिला नोट सटहीमा ढिलाइ, दशैं नजिकिँदै जाँदा स्थानीयवासीहरू पर्खाइमा

भदौ ३१, सोलुखुम्बु । दशैं नजिकिँदै गर्दा सोलुखुम्बुका स्थानीयवासीहरू सुकिला नोटको पर्खाइमा छन् । हरेक वर्षझैँ यस वर्ष पनि दशैंको अवसरमा सुकिला नोट सटहीको सेवा उपलब्ध गराइने भनिए पनि यसपालि ढिलाइ भएको हो ।

राष्ट्रिय वाणिज्य बैंक शाखा सोलुखुम्बुका प्रबन्धक सुमन निरौलाका अनुसार, सुकिला नोट वितरणका लागि आवश्यक पत्राचार भइसकेको छ तर जिल्लामा सुकिला नोट अझै नआएपुगेको हो । नोट आइपुगेपछि तुरुन्तै वितरण सुरु गरिने प्रबन्धक निरौलाको भनाई छ । यसअघि नै सुकिला नोट वितरण सुरु गर्ने योजना भए पनि जेनजी आन्दोलनका कारण सेवा स्थगित भएको थियो ।

विगतका वर्षहरूमा दशैंको मुखमा बैंकले सुकिला नोट वितरण गर्दै आएकोमा यसपालि भने ढिलाइ हुँदा नागरिकहरू पर्खाइमा छन् । बैंकले दशैंको बिदा सुरु हुनुअघि अन्तिम दिनसम्म सुकिला नोट सटही सेवा दिने जनाएको छ । तर, नोट कहिले आउने भन्नेमा अनिश्चितता कायम छ । स्थानीयहरू भने यस सेवाको पर्खाइमा दैनिकजसो बैंक चहार्न बाध्य छन् ।