सोलुखुम्बुमा खोलाले बगाउँदा ६५ वर्षीया वृद्धाको ज्यान गयो

भदौ ३१, सोलुखुम्बु । सोलुखुम्बुको सोलुदुधकुण्ड नगरपालिका–१ टाक्सिन्दु स्थित सत गाउँकी ६५ वर्षीया तिरिमाया राईको खोलाले बगाउँदा ज्यान गएको छ । हेवा गाउँ गएर घर फर्कने क्रममा दिउँसो करिब १ देखि २ बजेको बीचमा खुदुरुक खोलामा तर्ने क्रममा राईको ज्यान गएको हो ।

भदौ २९ गते अविरल वर्षाका कारण खोलामा पानीको बहाव एक्कासि बढ्दा दुर्घटना भएको प्रहरीले जनाएको छ । प्रहरी निरीक्षक विकास राईका अनुसार राईको शव खोलाले बगाएर करिब १०० मिटर तल भेटिएको थियो । उनको शव जिल्ला अस्पताल फाप्लुमा पोस्टमार्टम गरी परिवारको जिम्मा लगाइएको प्रहरीले जनाएको छ । लगातारको वर्षाले खोलानाला जोखिमपूर्ण बनेका बेला सर्वसाधारणलाई सचेत रहन प्रहरीले आग्रह गरेको छ ।