थुलुङ दुधकोशी गाउँपालिकाले गर्यो बाढी पहिरो पीडितलाई राहत वितरण गर्ने निर्णय

भदौ ३१, सोलुखुम्बु । सोलुखुम्बुको थुलुङ दुधकोशी गाउँपालिकाले बाढी पहिरो पीडितलाई क्षतिको आधारमा राहत रकम प्रदान गर्ने भएको छ । गाउँपालिका अध्यक्ष असिम राईको अध्यक्षता मंगलबार सम्पन्न कार्यपालिका बैठकले मानवीय क्षति भएकालाई ५० हजार र अन्य क्षति भएकालाई १५ हजार सम्म राहत प्रदान गर्ने निर्णय गरेको हो ।

प्रवक्ता भोजराज कार्कीका अनुसार तीन वर्गमा बिभाजन गरि क्षतिको मुल्यांकन गरिनेछ । यस अघि स्थलगत गरिएको अध्ययन र प्राविधिक सहितको टोलीले पेश गरेको प्रतिवेदनको आधारमा क्षतिको मुल्यांकन गरिने छ । पुर्ण क्षति हुनेलाई १५ हजार, आंशिक क्षति हुनेलाई १० हजार र सामान्य क्षति हुनेलाई ५ हजार राहत रकम प्रदान गरिने प्रवक्ता कार्कीले जानकारी दिनुभयो ।

यस वर्षको भीषण वर्षात संगै आएको बाढीले गाउँपालिकाको वडा नम्बर ६ मुक्ली, वडा नम्बर १ नेले, वडा नम्बर ५ जुबु र वडा नम्बर ७ देउसा लगायतमा क्षति भएको छ । यस्तै वडा नम्बर ६ स्थित शिकुखोलाले बगाउँदा वडा नम्बर ८ का मिङमार तामाङको मृत्यु भएको थियो । निजको परिवारलाई र.५० हजार राहत रकम प्रदान गरिने पनि कार्यपालिका बैठकले निर्णय गरेको छ ।