सोताङ गाउँपालिकामा जेनजी समूहको तीन बुँदे ध्यानाकर्षण

असोज १, सोलुखुम्बु । सोलुखुम्बुको सोताङ गाउँपालिकाका जेनजी समूहले पालिकाको सुशासन र प्रभावकारी सेवा प्रवाहमा गम्भीर प्रश्न उठाउँदै तीन बुँदे ध्यानाकर्षण पत्र सार्वजनिक गरेका छन् । एक विज्ञप्ति मार्फत जेनजी समूहले पालिकामा देखिएको लापरबाही, अनियमितता र उत्तरदायित्वहीन व्यवहारप्रति असन्तुष्टि जनाउँदै तत्काल सुधारको माग गरेको हो ।

जेनजी समूहले पहिलो बुँदामा सोताङ गाउँपालिका वडा नं ३ र वडा नं ४ का वडाध्यक्षहरू प्रायः कार्यालयबाट बाहिर रहने गरेको गुनासो गरेका छन् । यसले दुबै वडाका सर्वसाधारणले आवश्यक सेवा प्राप्त गर्न कठिनाइ व्यहोर्नु परेको जनाइएको छ । जनप्रतिनिधिहरूको यस किसिमको अनुपस्थितिले सरकारी सेवामा जनताको विश्वास खस्किरहेको भन्दै तत्काल सुधारको माग गरिएको छ । दोस्रो बुँदामा, पालिकाको उपाध्यक्ष संलग्न रहेको भनिएको सिलाई कटाइ सम्बन्धी तालिममा भएको ४५ हजार रुपैयाँको घुस प्रकरणप्रति गम्भीर ध्यानाकर्षण गराइएको छ ।

जेनजी समूहले यस घटनाको गम्भीर छानबिन गर्न माग गर्दै ३० दिनभित्र सत्यतथ्य सार्वजनिक गर्न र दोषी तथा निर्दोष छुट्याएर आवश्यक कारबाही प्रक्रिया अघि बढाउन पालिकालाई आग्रह गरेको छ । तेस्रो बुँदामा, पालिकाका कर्मचारीहरू सरकारी पोशाक र परिचय पत्र विनै कार्यालय समयमा सेवामा देखिने गरेको भन्दै असन्तुष्टि व्यक्त गरिएको छ ।

नेपाल सरकारले तोकेको पोशाक र परिचय पत्रको अनिवार्य प्रयोग गरी पारदर्शी र उत्तरदायित्वपूर्ण सेवा प्रवाह सुनिश्चित गर्न माग गरिएको छ । जेनजी समूहको ध्यानाकर्षण पत्र सार्वजनिक भएपछि स्थानीयबासी र सामाजिक संघसंस्थाहरूले पनि चासो देखाएका छन् । जनप्रतिनिधि र कर्मचारीको उत्तरदायित्वबोध र सेवा प्रवाहमा सुधार ल्याउन जेनजी समूहले अघि सारेका मुद्दाहरू यथाशीघ्र सम्बोधन हुनुपर्ने स्थानीयको भनाइ छ ।