बडादशैं, तिहार र छठको अवसरमा दिक्तेलमा सहुलियत मूल्य पसल सञ्चालन

असोज ३, सोलुखुम्बु । नजिकिँदै गरेको बडादशैं, तिहार र छठ पर्वको अवसरमा खाद्य व्यवस्था तथा व्यापार कम्पनी लिमिटेड, शाखा कार्यालय दिक्तेल खोटाङले सहुलियत पसल सञ्चालनमा ल्याएको छ । शाखा प्रमुख सुजन बाबु आचार्यका अनुसार आम उपभोक्ताको हितलाई ध्यानमा राखी चाडबाड अवधिभर अत्यावश्यक खाद्य तथा उपभोग्य वस्तु सहुलियत मूल्यमा उपलब्ध गराउने उद्देश्यले पसल सञ्चालन गरिएको हो ।

सहुलियत पसल यही भाद्र ३० गतेदेखि कार्तिक १० गतेसम्म सञ्चालन हुनेछ । यस अवधिमा कम्पनीले तीन प्रकारका चामल विशेष छुटसहित वितरण गर्दै आएको छ । जसअनुसार, अरुवा सोना मन्सुली चामल प्रतिकिलो ५९ रुपैयाँ, स्ट्रीम जीरा मसिनो चामल प्रतिकिलो ८५ रुपैयाँ र स्तर उन्नत स्ट्रीम जीरा मसिनो चामल पनि प्रतिकिलो ८५ रुपैयाँमा उपभोक्तालाई उपलब्ध गरार्ईरहेको दिक्तेलबाट सहकर्मी अशोक राईले जानकारी दिनुभयो । खाद्य व्यवस्था कम्पनीले सञ्चालन गर्ने सहुलियत मूल्य पसलमा सबै किसिमको चामलमा प्रतिकिलो ५ रुपैयाँ छुट हुनेछ ।