संविधान दिवसमा कांग्रेस सोलुखुम्बुद्वारा सरसफाइ र फलफुल वितरण कार्यक्रम

असोज ३, सोलुखुम्बु । नेपाली कांग्रेस सोलुखुम्बुले संविधान दिवसलाई विशेष महत्व दिँदै विभिन्न सामाजिक तथा जनसेवामूलक कार्यक्रमका साथ मनाएको छ । शुक्रबार सम्पन्न कार्यक्रमहरूमा सरसफाइ देखि लिएर अस्पतालका बिरामी र कारागारमा रहेका कैदीबन्दीहरूलाई फलफुल वितरणसम्मका गतिविधिहरू समावेश थिए । कार्यक्रमको नेतृत्व नेपाली कांग्रेस सोलुखुम्बुका जिल्ला सभापति नाम्गेल जाङ्बु शेर्पाले गर्नुभएको थियो ।

उहाँको नेतृत्वमा नयाँ बजारदेखि फाप्लुसम्म सरसफाइ अभियान सञ्चालन गरिनुका साथै जिल्ला अस्पताल फाप्लुमा उपचाररत बिरामीहरू र जिल्ला कारागारका बन्दीहरूलाई फलफुल वितरण गरिएको हो । सभापति शेर्पाले संविधान लोकतन्त्रको आधारशिला भएको उल्लेख गर्दै यसको रक्षा र सुदृढीकरणका लागि सम्पूर्ण नागरिक सचेत र जिम्मेवार बन्नुपर्ने आवश्यकता औंल्याउनुभयो । उहाँले संविधान दिवसजस्ता अवसरहरूलाई औपचारिकतामा मात्र सीमित नराखी समाजप्रति उत्तरदायी व्यवहारमार्फत मनाउनु सकारात्मक अभ्यास भएको बताउनुभयो ।

कार्यक्रममा नेपाली कांग्रेसका स्थानीय नेता, कार्यकर्ता तथा समर्थकहरूको उल्लेखनीय उपस्थिति रहेको थियो । कांग्रेस सोलुखुम्बुका अनुसार यस्ता कार्यक्रममार्फत संविधान दिवसलाई जनताको स्वास्थ्य, सरसफाइ र आपसी सद्भाव अभिवृद्धिका अवसरका रूपमा प्रयोग गर्ने प्रयास गरिएको हो । संविधान दिवसको अवसरमा आयोजित यस्ता कार्यक्रमहरूले नागरिकमा जिम्मेवारी बोध र सामाजिक सहभागिता बढाउने विश्वास गरिएको छ ।