पासाङ ल्हामु निकोल निक्की अस्पताल २० औँ वर्षमा प्रवेश

कार्तिक १०, सोलुखुम्बु । राष्ट्रिय विभूति पासाङ ल्हामु शेर्पाको नामबाट स्थापना गरिएको पासाङ ल्हामु निकोल निक्की अस्पताल आफ्नो २०औँ वार्षिकोत्सवमा प्रवेश गरेको छ। समुद्री सतहबाट झन्डै २,९०० मिटर उचाइमा अवस्थित यो अस्पतालको वार्षिकोत्सव कार्यक्रम लुक्लामै सम्पन्न भएको हो। कार्यक्रमका प्रमुख अतिथि स्विस राजदूत दानियल भेरोनिक मोलीले हिमालयको मुटुमा रहेको पासाङ ल्हामु निकोल निक्की अस्पताल स्विजरल्याण्ड र नेपालबीचको मित्रता र एकताको प्रतीक भएको बताउनुभयो।

उहाँका अनुसार दुर्गम क्षेत्रमा आधुनिक स्वास्थ्य सेवा २० वर्षसम्म निरन्तर प्रदान गर्नु स्वयंमा उल्लेखनीय उपलब्धि हो। अस्पतालका संस्थापक निकोल निक्कीले अस्पताल र फाउन्डेशनमार्फत मानव सेवामा योगदान दिने क्रममा स्विस दाताद्वय रब र राल्फप्रति विशेष धन्यवाद व्यक्त गर्नुभयो। उहाँले उनीहरूको सहयोगमा स्थापना गरिएको ८८‘बर्थ चिल्ड्रेन एजुकेसन प्रोजेक्ट’८८का कारण गर्भवती महिलाहरू अस्पताल आउन प्रोत्साहित भएको बताउनुभयो। निक्कीका अनुसार उक्त परियोजनाअन्तर्गत अस्पतालमा जन्मेका बालबालिकालाई कक्षा १० सम्म अध्ययनका लागि वार्षिक छात्रवृत्ति प्रदान गरिन्छ, जसको रकम प्रत्यक्ष बालबालिकाको बैंक खातामा जम्मा गरिन्छ।

यस वर्ष २६१ जना बालबालिकाले छात्रवृत्ति पाएका छन्। कार्यक्रमका विशिष्ट अतिथि खुम्बु पासाङ ल्हामु गाउँपालिका अध्यक्ष मिङ्मा छिरिङ शेर्पाले यो अस्पतालले स्थानीय बासिन्दा र बाह्य पर्यटक दुवैका लागि स्वास्थ्यसेवामा महत्त्वपूर्ण भूमिका खेल्दै आएको उल्लेख गर्नुभयो। अस्पतालका कार्यकारी निर्देशक पासाङकाजी शेर्पाले विगत २० वर्षमा अस्पतालले करिब ३ लाख बिरामीलाई सेवा प्रदान गरेको र १ हजार ५ सयभन्दा बढी बालबालिकाको जन्म गराएको जानकारी दिनुभयो। उहाँका अनुसार अस्पतालले निम्न आय भएका परिवारका लागि स्वास्थ्य र शिक्षा सुनिश्चित गर्दै आएको छ र हाल आधुनिक प्रविधिसहितका सेवा सुविधा प्रदान गर्दै आएको छ।

साथै, अस्पतालले आँखा शिविर र हाडजोर्नी शिविर पनि नियमित सञ्चालन गर्दै आएको बताइयो। यसरी दुर्गम हिमाली भेगमा अवस्थित पासाङ ल्हामु निकोल निक्की अस्पतालले २० वर्षदेखि निरन्तर सेवा पुर्‍याउँदै मानवता, शिक्षा र स्वास्थ्यको सन्देश फैलाइरहेको छ।