थुलुङ दुधकोशी–३ पञ्चनमा ३ सय बढी नागरिकलाई राष्ट्रिय परिचयपत्र वितरण

कार्तिक १४, सोलुखुम्बु । सोलुखुम्बुको थुलुङ दुधकोशी गाउँपालिका–३ पञ्चनमा ३२५ जनालाई राष्ट्रिय परिचयपत्र कार्ड वितरण गरिएको छ । वडामा २०८० साल असार मसान्तसम्म जिल्ला प्रशासन कार्यालय सोलुखुम्बु तथा विभिन्न वडामा आवेदन दिएका व्यक्तिहरूलाई कार्ड वितरण गरिएको वडा अध्यक्ष ईन्द्र मणी दाहालले जानकारी दिनुभयो ।

अध्यक्ष दाहालका अनुसार, यस अभियानले नागरिकहरूलाई आफ्नो परिचय प्रमाणिकरण गर्न सहजता ल्याउने र सरकारी सेवा प्राप्तिमा थप सुविधा पुर्याउने विश्वास लिइएको छ । राष्ट्रिय परिचयपत्र प्राप्त गरेपछि स्थानीयवासीहरूले सकारात्मक प्रतिक्रिया जनाएका छन् ।

उनीहरूले लामो समयदेखि प्रतीक्षामा रहेका कार्ड प्राप्त भएपछि राहत र सन्तुष्टि मिलेको बताएका छन् । वडा कार्यालयका अनुसार, बिहीबार सम्पन्न वितरण कार्यक्रममा वडा कार्यालयका कर्मचारीहरू, स्थानीय बासिन्दा र जनप्रतिनिधिहरूको उपस्थितिमा कार्य सहज र व्यवस्थित रूपमा सम्पन्न भएको थियो ।