बदर मत घटाउन सोलुखुम्बुमा मतदाता शिक्षा अभियान सुरु

फागुन ३, सोलुुखुम्बु । हिमाली जिल्ला सोलुखुम्बुमा प्रतिनिधिसभा सदस्य निर्वाचन लक्षित गर्दै आजदेखि औपचारिक रूपमा मतदाता शिक्षा कार्यक्रम सुरु गरिएको छ। निर्वाचन शिक्षा तथा मतदाता शिक्षा निर्देशिका, २०७८ अनुसार स्वीकृत विशेष कार्यक्रमअन्तर्गत जिल्लाका सबै स्थानीय तहका वडाहरूमा अभियान सञ्चालन गरिएको हो ।

जिल्लामा रहेका ८ वटा स्थानीय तहका ५२ वटै वडामा एक–एक जनाका दरले जम्मा ५२ जना मतदाता शिक्षा स्वयंसेवक परिचालन गरिएको जिल्ला निर्वाचन अधिकारी दिपेन्द्र राज अधिकारीले जानकारी दिनुभयो । उहाँका अनुसार स्वयंसेवकहरूलाई वडा–वडामा खटिनुअघि आवश्यक तालिम प्रदान गरिएको थियो, जसले उनीहरूलाई मतदाता शिक्षाका विषयवस्तु प्रभावकारी रूपमा प्रस्तुत गर्न सक्षम बनाएको छ ।

हाल स्वयंसेवकहरू जिल्लाभरका बस्ती र घरदैलोमा पुगेर नमूना मतपत्रमार्फत निर्वाचनको महत्त्व र मतदान गर्ने सही प्रक्रियाबारे जानकारी गराइरहेका छन्। विशेषगरी मतपत्रमा सही तरिकाले छाप लगाउने विधि सिकाउँदै उनीहरूले मतदातालाई सचेत, जिम्मेवार र सक्रिय सहभागिताका लागि प्रोत्साहित गरिरहेका छन् ।

जिल्ला निर्वाचन कार्यालय सोलुखुम्बुका अनुसार प्रभावकारी मतदाता शिक्षाले जिल्लामा मतदाताको सहभागिता दर बढाउने मात्र नभई बदर मतको अनुपातलाई उल्लेख्य रूपमा घटाउन महत्वपूर्ण योगदान पुर्याउने विश्वास लिइएको छ ।