दिक्तेलमा छड्के अनुगमन : ३१ हजार बढीका अखाद्य वस्तु जफत

अशोक राई, खोटाङ । खोटाङको दिक्तेल बजारमा प्रशासनले उपभोक्ता सुरक्षालाई केन्द्रमा राख्दै आकस्मिक बजार अनुगमन अभियान सञ्चालन गरेको छ । बजारमा म्याद गुज्रिएका तथा मापदण्ड विपरीत बिक्रीका लागि राखिएका दैनिक उपभोग्य सामग्रीहरू फेला परेपछि ती वस्तु जफत गरिएको हो ।

संयुक्त अनुगमन टोलीका संयोजक प्रशासन अधिकृत सम्शेर बहादुर राईको नेतृत्वमा बुधबार दिक्तेल रत्नपार्क परिसरका एक दर्जनभन्दा बढी होटल तथा किराना पसलमा छड्के जाँच गरिएको थियो । जाँचका क्रममा करिब ३१ हजार ८ सय रुपैयाँ बराबरका अखाद्य सामग्री नियन्त्रणमा लिइएको जनाइएको छ । जफत गरिएका सामग्रीमा पापड ५,५५०, चिसो पेय पदार्थ ५,३३०, बिस्कुट ३,९५०, आटा २,८८०, स्प्राइट २,३००, पानीपुरी २,२५०, सुजी १,६२५, चिप्स १,५००, बेसनको पिठो १,२०० रुपैयाँ त्यसैगरि चिउरा ८४०, जुस ८००, फेण्टा ८१०, चकलेट ५००, पेट्रोल एक जम्बु ४५०, लिची जुस ४२५, सस ४००, चाउचाउ ४००, सेभेन अप २८०, कोक २१० र दालमोट १०० रहेका छन् ।

यस्ता म्याद नाघेका तथा गुणस्तरहीन खाद्य वस्तुको सेवनले स्वास्थ्यमा गम्भीर असर पर्न सक्छ । उपभोक्ताहरूले सामान खरिद गर्दा म्याद, उत्पादन मिति र लेबल अनिवार्य रूपमा जाँच गर्न प्रशासनले आग्रह गरेको छ । शंका लागेमा सम्बन्धित निकायमा जानकारी गराउन पनि अनुरोध गरिएको छ । प्रमुख जिल्ला अधिकारी रेखा कँडेल तथा सहायक प्रमुख जिल्ला अधिकारी कोपिला राईको रोहवरमा जफत गरिएका सामग्रीहरू नष्ट गरिएको थियो ।

खोटाङका विभिन्न गाउँ तथा बजार क्षेत्रमा उपभोक्ताको जनस्वास्थ्यलाई मध्यनजर गर्दै यस्ता अनुगमन निरन्तर गरिने संयोजक प्रशासन अधिकृत सम्शेर बहादुर राईले बताउनुभयो । अनुगमनमा घरेलु तथा साना उद्योग कार्यालयका उद्योग अधिकृत भेषराज खत्री, खोटाङ उद्योग वाणिज्य संघका सचिव विनोद खड्का, जिल्ला प्रशासन कार्यालयका नासु लिला विक, कोष तथा लेखा नियन्त्रण कार्यालयका लेखापाल गणेश बहादुर खड्का लगायत सम्बन्धित निकायका प्रतिनिधि तथा सञ्चारकर्मीको उपस्थिति रहेको थियो ।