सिन्धुलीगढीमा बालमैत्री तथा पोषणमैत्री स्थानीय शासन सम्बन्धी ३ दिने कार्यशाला सुरु

चैत्र १०, सोलुखुम्बु । सिन्धुलीको सदरमुकाम सिन्धुलीगढीमा बालमैत्री र पोषणमैत्री स्थानीय शासन प्रवद्र्धन सम्बन्धी ३ दिने क्षमता विकास कार्यशाला सुरु भएको छ । दिगो विकास लक्ष्य अनुरूप नेपाल सरकारले सन् २०३० सम्म नेपाललाई पोषणमैत्री तथा बालमैत्री राष्ट्र घोषणा गर्ने लक्ष्यसहित देशभरका ७५३ वटै स्थानीय तहमा कार्यक्रम सञ्चालन गर्दै आएको छ ।

पोषणमैत्री स्थानीय शासनका ४९ वटा सूचक तथा बालमैत्री स्थानीय शासनका ५१ वटा सूचक पूरा गर्ने उद्देश्यसहित कार्यक्रम कार्यान्वयन भइरहेको छ । कार्यशालामा उदयपुर, सिन्धुली, महोत्तरी, सर्लाही र रौतहटका स्थानीय तहमा कार्यरत पोषण सहजकर्ता, स्वास्थ्य शाखा तथा महिला बालबालिका शाखाका कर्मचारीहरू सहभागी रहेको सहकर्मी ठविन्द्र मगरले जानकारी दिनुभयो । साथै वल्र्ड भिजन इन्टरनेशनल नेपाल को सहयोगमा कार्यक्रम सञ्चालन गरिरहेका विकास साझेदार संस्थाका प्रतिनिधिहरूको पनि सहभागिता रहेको छ ।

कार्यक्रमको उद्घाटन सत्रमा बोल्दै सिन्धुली जिल्ला समन्वय समितिकी उपप्रमुख शान्ता कार्कीले पोषणमैत्री र बालमैत्री स्थानीय शासन कार्यक्रम अन्तर्गत केही स्थानीय तहहरूले वडास्तरबाट घोषणा सुरु गरिसकेको उल्लेख गर्नुभयो । उहाँले घोषणा मात्र पर्याप्त नभई यसको दिगोपनाका लागि आवश्यक नीति तथा ऐन निर्माण गरी प्रभावकारी कार्यान्वयनमा ल्याउनु आवश्यक रहेको बताउनुभयो । साथै, सम्बन्धित मन्त्रालय र जिल्लास्तरीय निकायबाट नियमित सुपरिवेक्षण तथा अनुगमन हुनुपर्नेमा पनि जोड दिनुभयो । कार्यक्रमको उद्घाटन जिल्ला समन्वय समितिका प्रमुख कासन लामाले गर्नुभएको हो ।

कार्यक्रमको सहजीकरण संघीय मामिला तथा सामान्य प्रशासन मन्त्रालयका महाशाखाका उपसचिव दीपक ढकाल र तिलोतम पौडेलले गरिरहनुभएको छ । यो कार्यशालाबाट सहभागीहरूलाई बालमैत्री तथा पोषणमैत्री स्थानीय शासन कार्यान्वयनमा थप दक्षता अभिवृद्धि हुने अपेक्षा गरिएको छ ।