दिप्लीघाटको बेलीब्रिज जोखिममा, सवारीसाधन सञ्चालनमा सतर्कता अपनाउन आग्रह

असोज ४, सोलुखुम्बु । सोलुखुम्बुको सोताङ र महाकुलुङ गाउँपालिकालाई सदरमुकाम सल्लेरी तथा राजधानी काठमाडौंसँग प्रत्यक्ष रूपमा जोड्ने नेले–बुढीडाँडा–सोताङ सडकखण्डअन्तर्गतको दिप्लीघाटस्थित बेलीब्रिज जोखिममा परेको छ । सोताङ गाउँपालिका–१ र थुलुङ दुधकोशी गाउँपालिका–८ जोड्ने दिप्लीघाटस्थित बेलीब्रिजको थुलुङ दुधकोशी गाउँपालिकातर्फको भाग नदी कटानका कारण जोखिमयुक्त अवस्थामा पुगेको गाउँपालिकाका प्रवक्ता भोजराज कार्कीले जानकारी दिनुभयो ।

नदीले पुलको पहुँचमार्ग तथा आसपासको भाग कटान गरेपछि पुलमा आवतजावत जोखिमपूर्ण बनेको हो । जोखिमको अवस्थाबारे प्रहरी चौकी मुक्लीका प्रहरी इन्चार्ज जीवकुमार खड्कासहितको टोली तथा प्राविधिक टोलीले स्थलगत अध्ययनसमेत गरेको जनाइएको छ ।

पुलको अवस्थाका कारण सवारीसाधन सञ्चालनमा उच्च जोखिम रहेको भन्दै तत्काल विशेष सतर्कता र सावधानी अपनाउन आग्रह गरिएको छ । सम्बन्धित यातायात व्यवसायी, चालक, यात्रु तथा सर्वसाधारणलाई पुल क्षेत्रमा आवतजावत गर्दा आवश्यक सावधानी अपनाउन गाउँपालिकाले अनुरोध गरेको छ ।