१५ वर्षमै उद्यमी बनेकी अन्जिता : ५ सय रुपैयाँबाट सुरु गरेको व्यवसाय अहिले आम्दानीको आधार बन्दै

असोज ४,सोलुखुम्बु । उमेरले १६ वर्ष । हातमा किताब र कापी हुनुपर्ने उमेरमा सल्लेरीकी अन्जिता मगर भने आफ्नै सीप र सिर्जनशीलताबाट व्यवसायको बाटोमा अघि बढिरहेकी छन् । सोलुदुधकुण्ड नगरपालिका–५, सल्लेरीकी अन्जिताले करिब एक वर्षदेखि आफैँले बनाएका सिलाम साक्मा, बुके, मिनी किचेनलगायतका हस्तनिर्मित सामग्री बिक्री गर्दै आएकी छन् । पढाइसँगै समय व्यवस्थापन गरेर व्यवसायलाई निरन्तरता दिइरहेकी उनी अहिले नयाँ बजारमा आफ्ना उत्पादन बिक्रीका लागि ल्याउने गर्छिन् ।

उनको उद्यमशीलताको सुरुवात भने निकै सानो लगानीबाट भएको हो । अन्जिताले ५ सय रुपैयाँबाट व्यवसाय सुरु गरेकी थिइन् । सुरुमा रिबन, र्यापिङ पेपरलगायतका सामग्री खरिद गरेर बुके बनाउन थालेकी उनले विस्तारै त्यसैबाट आम्दानी गर्न थालिन् । बुके बनाउने सीप उनले कुनै औपचारिक तालिमबाट सिकेकी होइनन् । सामाजिक सञ्जाल टिकटकमा भिडियो हेर्दै सिक्ने र अभ्यास गर्ने क्रममा उनले यो काम सुरु गरेकी हुन् । सुरुमा बिक्री गर्ने उद्देश्यभन्दा पनि रहरले बुके बनाएर राख्ने सोच भए पनि पछि त्यसैलाई व्यवसायमा परिणत गर्ने विचार आएको उनी बताउँछिन् । अन्जिताले सोलुखुम्बुमा आफूले पहिलोपटक बुके बिक्रीका लागि ल्याएको अनुभव सुनाउँछिन् ।

आफूले बनाएर बिक्री गर्न थालेपछि विस्तारै अरूले पनि यस्ता सामग्री बनाउन थालेको उनको भनाइ छ । अहिले उनी आफूले बनाएका सामग्री बिक्री गर्नुका साथै आवश्यकताअनुसार अर्डरसमेत लिन्छिन् । उनका अनुसार हस्तनिर्मित बुके बनाउन भने सोचेजस्तो सजिलो छैन । र्यापिङ पेपर काट्ने, सामग्री मिलाउने, आकार दिने र ग्लु प्रयोग गरेर जोड्ने काममा समय र मेहनत लाग्छ । एउटा बुके बनाउन सामान्यतः एक घण्टासम्म समय लाग्न सक्छ । उनले बनाएका सामग्रीको मूल्य आकार र डिजाइनअनुसार फरक–फरक छ । मिनी किचेन तथा केही बुके करिब एक सय रुपैयाँदेखि, सिलाम साक्मा करिब दुई सय ५० रुपैयाँदेखि बिक्री हुने गर्छन् भने अर्डरअनुसारका बुकेको मूल्य अझ बढी हुन सक्छ । व्यवसायसँगै अन्जिता विद्यार्थी पनि हुन् ।

उनी कक्षा ९ मा अध्ययनरत छिन् । पढाइलाई असर नपर्ने गरी छुट्टै समय निकालेर सामग्री बनाउने र बजारमा बिक्रीका लागि ल्याउने गरेको उनी बताउँछिन् । उनको यो प्रयासमा परिवारको समेत साथ छ । अन्जिताको कामबाट उनका साथीहरू पनि प्रभावित भएका छन् । उनका साथी निरुता अहिले यस्तै सामग्री बनाउन सिक्ने क्रममा छिन् ।

अन्जिताबाट प्रेरणा लिएर घरमै साना–साना सामग्री बनाउन थालेको उनी बताउँछिन् । अन्जिताका लागि यो व्यवसाय केवल आम्दानीको माध्यम मात्र होइन, आफ्नै सीपबाट केही गर्न सकिन्छ भन्ने आत्मविश्वासको सुरुवात पनि बनेको छ । पढाइसँगै आफ्नो रुचि र सीपलाई व्यवसायमा जोडेर अघि बढिरहेकी अन्जिताको कथा सानो लगानीबाट पनि मेहनत, सिर्जनशीलता र निरन्तरताका साथ केही गर्न सकिन्छ भन्ने उदाहरण बनेको छ । फरक फरक हेडलाइन लेख