उदयपुरको रौतामाईमा ४५ दिने एडभान्स सिलाई–कटिङ्ग तालिम सुरु

बैशाख १८, सोलुखुम्बु । उदयपुरको रौतामाई गाउँपालिकामा महिलालाई लक्षित गर्दै ४५ दिने एडभान्स सिलाई–कटिङ्ग तालिम सुरु गरेको छ। मिति २०८३ बैशाख १८ गते उद्घाटन गरिएको उक्त तालिम महिला, बालबालिका तथा ज्येष्ठ नागरिक शाखाको वार्षिक स्वीकृत कार्यक्रमअन्तर्गत सञ्चालन गरिएको हो। तालिममा ७ जना महिलाको सहभागिता रहेको छ भने कार्यक्रम जेठ मसान्तमा सम्पन्न हुने आयोजकले जानकारी दिएको छ।

सीपमूलक तालिममार्फत स्थानीय महिलालाई आत्मनिर्भर बनाउने उद्देश्यले कार्यक्रम सञ्चालन गरिएको हो। उद्घाटन समारोहमा बोल्दै गाउँपालिका अध्यक्ष वीरन्द्र कुमार मगरले गाउँपालिकाले प्रत्येक वर्ष विभिन्न सीपमूलक तालिम सञ्चालन गरे पनि अपेक्षित प्रतिफल अझै पूर्ण रूपमा देखिन नसकेको भन्दै गुनासो व्यक्त गर्नुभयो।

उहाँले यस तालिमलाई व्यवहारिक रूपमा उपयोगी बनाउँदै सहभागीलाई यही पेशाबाट आयआर्जन गर्न सक्ने गरी सीप सिक्न आग्रह गर्दै शुभकामना व्यक्त गर्नुभयो। तालिम सहजीकरण कमल बाबु परियारले गरिरहनुभएको छ। कार्यक्रमले ग्रामीण क्षेत्रमा महिलाको सीप विकास र आर्थिक सशक्तीकरणमा योगदान पुर्‍याउने अपेक्षा गरिएको छ।