सुरु गरेका योजना भटाभट सक्दै माप्य, २ दिनमा २ वटा सेवामुखी भवन उद्‌घाटन 

बैशाख २१, सोलुखुम्बु । सोलुखुम्बुको माप्य दुधकोशी गाउँपालिकाले विकास आयोजनाहरूको सम्पन्नतालाई प्राथमिकताका साथ काम अघि बढाएको छ । गाउँपालिकाले चालु आर्थिक वर्षभित्रमा सम्पन्न गरिसक्ने आयोजनाहरूको कामलाई सम्पन्न गर्न तिव्रता दिएको हो । यही क्रममा आइतबार स्वास्थ्य चौकी जुभिङको भवन उद्‌घाटन गरेको गाउँपालिकाले सोमबार वडा नम्बर ५ को वडा कार्यालय भवन उद्‌घाटन सम्पन्न गरेको हो ।  प्रदेश सभा सदस्य बुद्धिकुमार राजभण्डारीको प्रमुख आतिथ्यतामा सम्पन्न प्रशासनिक भवन उद्‌घाटन कार्यक्रममा गाउँपालिका अध्यक्ष बुद्धिकिरण राईको अध्यक्षता रहेको थियो । भवन उद्घाटन प्रदेश सांसद राजभण्डारी, गाउँपालीका अध्यक्ष राइ, उपाध्यक्ष गाैरव राइ, वडा अध्यक्ष अविरल वाइबाले संयुक्त रूपमा गर्नुभएकाे थियाे । 

थालीएका कामहरूलाई पूर्णता दिँदै स्थानीय सरकारको बाँकी कार्यकाल समापन गर्ने लक्ष सहित निर्माणका कामलाई प्राथमिकता दिइएको गाउँपालिका अध्यक्ष राईले बताउनुभयो ।  आइतबार उद्घाटन गरिएको स्वास्थ्य चौकी जुभिङ भवन गाउँपालिका र दातृ निकाय हिल्स प्रोजेक्टको ४ करोड २२ लाख रुपैयाँको लागतमा निर्माण सम्पन्न गरिएको हो ।  सुविधा सम्पन्न स्वास्थ्य चौकी भवनबाट यहाँका नागरिकले गुण।स्तरीय स्वास्थ्य सेवा प्राप्त गर्ने विश्वास लिइएको गाउँपालिकाले जनाएको छ ।

 उद्घाटनमा गाउँपालिका उपाध्यक्ष गौरव राई सहित स्थानीय सरोकारवालाको उपस्थिति थियो । यस्तै साेमबार उद्‌घाटन गरिएको वडाको प्रशासनिक भवन गाउँपालिका र जिल्ला समन्वय समितिको लागत साझेदारीमा निर्माण भएको हो । भवन निर्माणका लागी  कुल ६२ लाख ३५ हजार रुपैयाँ खर्च भएको गाउँपालिकाका इन्जिनियर जोनाथन राईले बताउनुभयो  । सो बजेटमा गाउँपालिकाको ४० र जिल्ला समन्वय ६० प्रतिशत लागत खर्च भएको छ ।