बैशाख २१, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर ६ मा कृषकहरूलाई कृषि औजार वितरण गरिएको छ । सोमबार नगरपालिकाको कृषि यान्त्रीकरण प्रवद्र्धन कार्यक्रम अन्तर्गत वडा नम्बर २, ५ र ६ का ७ वटा कृषक समूहलाई विभिन्न कृषि सामग्री हस्तान्तरण गरिएको हो । नगरपालिकाका कृषि शाखा प्रमुख डोल्मादिकी शेर्पाका अनुसार वितरण गरिएका सामग्रीहरूमा ४ वटा मिनिटिलर, ५ वटा थ्रेसर, ४ वटा कम्बाइन मिल, ५ वटा घाँस काट्ने मेसिन तथा ४ वटा कर्न सेलर रहेका छन् ।
यसैगरी आलु खेती प्रवद्र्धन कार्यक्रम अन्तर्गत ४ वटा कृषि फर्मलाई थप ४ वटा मिनिटिलर समेत प्रदान गरिएको जानकारी दिइएको छ । वितरण कार्यक्रममा बोल्दै नगरपालिकाका मेयर नाम्गेल जाङ्बु शेर्पाले कृषि औजारहरूको सामूहिक प्रयोग गर्न कृषक समूहहरूलाई आग्रह गर्नुभयो ।
उहाँले आधुनिक उपकरणको प्रयोगले श्रम तथा समय दुवैको बचत हुने र उत्पादनमा वृद्धि हुने विश्वास व्यक्त गर्नुभयो । कार्यक्रममा वडा अध्यक्ष फुर्वा ग्याल्जने शेर्पाले औजार वितरणसँगै यसको प्रभावकारी प्रयोगको निगरानी पनि गरिने बताउनुभयो । कृषकहरूले भने प्राप्त सामग्रीको सही सदुपयोग गर्दै कृषि उत्पादनमा वृद्धि गर्ने प्रतिबद्धता जनाएका छन् ।
Discussion about this post