खुम्बु पासाङल्हामु गाउँपालिकाको निर्देशन : ७ दिनभित्र सार्वजनिक जग्गा खाली नगरे कारबाही गरिने

वैशाख २३, सोलुखुम्बु – साेलुखुम्बुकाे खुम्बु पासाङल्हामु गाउँपालिकाले सार्वजनिक जग्गा अतिक्रमण गरी प्रयोग गरिरहेका व्यक्तिहरूलाई तत्काल खाली गर्न कडा निर्देशन दिएको छ। गाउँपालिकाले जारी गरेको अत्यावश्यक सूचनामा सार्वजनिक जग्गा, बाटो, टहरा, कुलो, ताल तथा पोखरी जस्ता संरचनामा भइरहेको अतिक्रमणप्रति गम्भीर ध्यानाकर्षण भएको जनाएको छ।

स्थानीय सरकार सञ्चालन ऐन, २०७४ को दफा ११ अनुसार सार्वजनिक सम्पत्तिको संरक्षण गर्ने जिम्मेवारी स्थानीय तहको भएकाले गाउँपालिकाले यस्तो कदम चाल्न बाध्य भएको स्पष्ट पारेको छ। कार्यालयका अनुसार केही व्यक्तिहरूले सार्वजनिक जग्गा कब्जा गरी भोगचलन गरिरहेको गुनासो बढ्दै गएको छ।

सूचनामा उल्लेख भएअनुसार, सूचना प्रकाशन भएको मितिले ७ दिनभित्र अतिक्रमित सार्वजनिक जग्गा स्वतः खाली गर्न आग्रह गरिएको छ। तोकिएको समयभित्र खाली नगरिएमा गाउँपालिकाले प्रचलित कानुन बमोजिम अतिक्रमण हटाउने अभियान सञ्चालन गर्ने र त्यसक्रममा लाग्ने सम्पूर्ण खर्च, क्षतिपूर्ति तथा अन्य जिम्मेवारी सम्बन्धित पक्षबाटै असुल गरिने चेतावनी दिइएको छ।

गाउँपालिकाले सार्वजनिक सम्पत्तिको संरक्षणमा सहयोग गर्न आम नागरिकसँग अपिल गर्दै, कतै अतिक्रमण भएको पाइएमा नजिकको वडा कार्यालय वा गाउँपालिकामा जानकारी गराउन समेत अनुरोध गरेको छ।

यो कदमले सार्वजनिक सम्पत्तिको संरक्षणसँगै अतिक्रमण नियन्त्रणमा कडाइ आउने अपेक्षा गरिएको छ।