बैशाख २३, सोलुखुम्बु । सगरमाथा आधारशिविरमा कार्यरत पर्यटन विभागका सम्पर्क अधिकृत खिमलाल गौतमले आफ्नो नाम जोडेर केही सञ्चारमाध्यममा आएका समाचारप्रति गम्भीर आपत्ति जनाउनुभएको छ । उहाँले ती समाचारलाई भ्रामक, कपोलकल्पित तथा चरित्रहत्या गर्ने उद्देश्यले प्रेरित भएको बताउनुभएको हो ।
विगत दुई सातादेखि आधारशिविरमा अस्थायी फिल्ड कार्यालय सञ्चालन गर्दै आउनुभएका गौतमले विभागले तोकेको जिम्मेवारीअनुसार दैनिक रूपमा घटनाहरूको रिपोर्टिङ भइरहेको स्पष्ट पार्नुभयो । उहाँका अनुसार पर्यटन नियमावली २०५९ तथा पर्यटन उद्योग सेवा प्रवाह निर्देशिका २०७० बमोजिम आफूहरू विभागको अनुमति बिना मिडियासँग प्रत्यक्ष रूपमा बोल्न नमिल्ने सामाजिक संजाल मार्फत जानकारी गराउनुभयो ।
उहाँले भन्नुभयो, “हामी विभागको काममा सहजीकरण गर्न यहाँ छौं । विभागले आवश्यक ठानेमा औपचारिक रूपमा जानकारी दिन हामी सधैं तयार छौं ।”गौतमले आफूले एक सञ्चारमाध्यमलाई अन्तर्वार्ता नदिएको विषयलाई लिएर लक्षित रूपमा समाचार बनाइएको आरोप समेत लगाउनुभएको छ ।
उहाँले यस्ता गतिविधिमा केही तत्वहरू सक्रिय रहेको र पर्वतीय पर्यटनलाई बदनाम गर्ने प्रयास भइरहेको उल्लेख गर्नुभयो । उहाँले आफूमाथि लगाइएका आरोप प्रमाणित भए सजाय भोग्न तयार रहेको तर आरोप पुष्टि नभए सम्बन्धित व्यक्तिहरूलाई संविधान, प्रेस काउन्सिल ऐन तथा प्रचलित कानूनअनुसार कारबाही गर्न माग गर्नुभएको छ ।
Discussion about this post