सोलुदुधकुण्डका ८९ प्रतिशत विद्यार्थी उत्तीर्ण, ४ वटा विद्यालयको शतक 

बैशाख ३०, सोलुखुम्बु । सोलुखुम्बुको सोलुदुधकुण्ड नगरपालिकाका ८९ प्रतिशत विद्यार्थीले एसइई परीक्षा उत्तीर्ण गरेका छन् ।  २०८२ सालको माध्यमिक शिक्षा परीक्षा  को विद्यालय गत नतिजा विवरण सार्वजनिक गर्दै नगरपालिकाले ८९ दशमलव ५४ प्रतिशत विद्यार्थी उत्तीर्ण भएको जनाएको हो ।  

नगर शिक्षा शाखाद्वारा सार्वजनिक विवरण अनुसार नगरपालिकाभित्रका सामुदायिक तथा संस्थागत विद्यालय गरी १४ विद्यालयका ३९२ विद्यार्थी परीक्षामा सहभागी भएका थिए । तीमध्ये ३५१ विद्यार्थी उत्तीर्ण भएका छन् । नगरपालिका भित्रको ४ वटा  विद्यालयले शत प्रतिशत नतिजा हासिल गरेका छन् ।  तिङ्लाको सिंहकाली मावि र च्याल्सा स्थीत सगरमाथा माविले शत प्रतिशत नतिजा हासिल गरेका हुन् । यस्तै सल्लेरी स्थित जन जाग्रीति मावि र जुनवेसी स्थिती जुनवेशी माविले पनि शतप्रतिशत नतिजा हासिल गर्न सफल भएका छन् भने अन्य १० वटा विद्यालयले भने शत प्रतिशत नतिजा हासि गर्न सकेनन् ।

यस वर्ष गार्मा मावी नगरपालिकाकै कमजोर नतिजा निकाल्ने सामुदायिक विद्यालय बनेको छ । उक्त विद्यालयका ३८ मध्ये २१ विद्यार्थी उत्तीर्ण हुँदा ५५ दशमलव २६ प्रतिशत नतिजा हासिल गरेको छ । यता संस्थागत विद्यालय तर्फ सबैभन्दा कमजोर नतिजा फाप्लु सामुदायिक विद्यालयको छ । उक्त विद्यालयका ५८ दशमलव ३३ प्रतिशत विद्यार्थी मात्रै उत्तीर्ण भएका छन् । त्यस्तै चाँगेस्थान माविले ९३.०२ प्रतिशत, जनप्रिय माविले ९४.७३ प्रतिशत तथा टाक्सिन्दु माविले ९१.६६ प्रतिशत नतिजा हासिल गरेका छन्।

यता पिके माविको उत्तीर्ण प्रतिशत ८८.२३, बालेश्वर माविको ८८.८८ तथा भीमसेनथान माविको ८५.७१ प्रतिशत रहेको छ । संस्थागत विद्यालयतर्फका हाइट हिल्स माविले ९०.३२ प्रतिशत, माउन्ट एभरेष्ट माविले ८२.३५ प्रतिशत तथा फाप्लु सामुदायिक माविले ५८.३३ प्रतिशत नतिजा ल्याएका छन् ।

अन्य विद्यालयहरूलाई उछिन्दै यस पटक संस्थागत तर्फ सगरमाथा माविले शत प्रतिशत नतिजा ल्याएको छ ।  नगर शिक्षा शाखाले विद्यालयगत नतिजाको समीक्षा गर्दै आगामी दिनमा शैक्षिक गुणस्तर सुधारका लागि थप योजना अघि बढाइने जनाएको छ। नगरपालिकाले विद्यालयगत नतिजाको विश्लेषण गर्दै आगामी दिनमा शैक्षिक गुणस्तर सुधारका लागि थप योजना अघि बढाइने जनाएको छ।