रुख ढलेपछि अवरुद्ध भएको वाकु–सल्लेरी भित्री सडक ८ घण्टापछि सञ्चालनमा

सोलुखुम्बु, जेठ ८ । सोलुखुम्बुको थुलुङ दुधकोशी गाउँपालिका–८ रनेमस्थित वाकुबाट सल्लेरी जाने भित्री सडकखण्डमा रुख ढल्दा शुक्रबार बिहानदेखि सडक अवरुद्ध भएको छ। जिल्ला प्रहरी कार्यालय सोलुखुम्बुका अनुसार बिहान करिब ६ बजे सडकमा ठूलो रुख ढलेपछि यातायात पूर्ण रूपमा प्रभावित भएको थियो। अवरोध हटाउन स्थानीयवासी र प्रहरीको संयुक्त प्रयासमा मेसिन प्रयोग गरी रुख काटेर हटाइएको प्रहरीले जनाएको छ। प्रहरीका अनुसार करिब ८ घण्टापछि दिउँसो २ः३० बजेबाट सडक पुनः सञ्चालनमा आएको हो। सडक खुलेसँगै रोकिएका सवारीसाधन गन्तव्यतर्फ सञ्चालनमा आएका छन्।