नेचासल्यान गाउँपालिकामा निःशुल्क स्वास्थ्य जाँच शिविर सञ्चालन हुने

सबिना राई, जेठ, १४, सोलुखुम्बु । सोलुखुम्बुको नेचासल्यान गाउँपालिकामा पाठेघरको मुखको क्यान्सर स्क्रिनिङ, सक्रिय क्षयरोग खोजपडताल तथा अपाङ्गता भएका व्यक्तिहरुका लागि निःशुल्क स्वास्थ्य जाँच शिविर सञ्चालन गरिने भएको छ । गाउँपालिकाको चालु आर्थिक वर्ष २०८२/०८३ को वार्षिक स्वीकृत कार्यक्रम अन्तर्गत प्रजनन रोग, क्षयरोग नियन्त्रण तथा अपाङ्गता रोकथाम कार्यक्रममार्फत प्रत्येक वडामा शिविर सञ्चालन गर्न लागिएको हो ।

स्वास्थ्य शाखा प्रमुख केशव बास्तोलाका अनुसार शिविर जेठ १७ गतेदेखि जेठ २२ गतेसम्म विभिन्न स्वास्थ्य संस्थाहरूमा सञ्चालन हुनेछ । शिविरको तालिका अनुसार जेठ १७ गते प्राथमिक स्वास्थ्य सेवा केन्द्र सल्यानमा, जेठ १८ गते सामुदायिक स्वास्थ्य इकाई शिमखर्क मा, जेठ १९ गते सामुदायिक स्वास्थ्य इकाई बुटुलिचौर तथा आधारभूत स्वास्थ्य सेवा केन्द्रमा, जेठ २० गते नेचा बतासे स्वास्थ्य चौकीमा, जेठ २१ गते आधारभूत स्वास्थ्य सेवा केन्द्र नेचासल्यान–४ मा तथा जेठ २२ गते नेचा बेतघारी स्वास्थ्य चौकीमा शिविर सञ्चालन गरिने जनाएको छ ।

शिविरमा ३० देखि ४९ वर्ष उमेर समूहका महिलाहरूको पाठेघरको मुखको क्यान्सर परीक्षण गरिनुका साथै आङ खस्ने समस्या, तल्लो पेटसम्बन्धी स्वास्थ्य समस्या लगायतका रोगहरूको जाँच, उपचार तथा परामर्श सेवा प्रदान गरिनेछ । त्यसैगरी क्षयरोग शंकास्पद बिरामीहरूको निःशुल्क खकार परीक्षण, अपाङ्गता भएका व्यक्तिहरूको स्वास्थ्य परीक्षण तथा शिविरमा उपस्थित सबै सेवाग्राहीहरूको सामान्य स्वास्थ्य परीक्षण, उपचार र परामर्श सेवा उपलब्ध गराइने गाउँपालिकाले जनाएको छ ।