सोलुखुम्बु, जेठ १४ — सोलुदुधकुण्ड नगरपालिका–७ गार्मास्थित सेकारसिंह आधारभूत विद्यालयमा वडा स्तरीय अन्तरविद्यालय सांस्कृतिक गायन तथा नृत्य प्रतियोगिता बिहीबार सम्पन्न भएको छ। विद्यार्थीहरूमा रहेको कला, संस्कृति, सिर्जनशीलता र आत्मविश्वासको विकास गर्ने उद्देश्यले आयोजित प्रतियोगितामा गार्माका चार विद्यालयका विद्यार्थीहरूले सहभागिता जनाएका थिए।
प्रतियोगितामा गार्मा माध्यमिक विद्यालय, सगरमाथा माध्यमिक विद्यालय, सिद्धार्थ आधारभूत विद्यालय र सेकारसिंह आधारभूत विद्यालयका विद्यार्थीहरूले जुनियर तथा सिनियर गायन र नृत्य विधामा प्रतिस्पर्धा गरेका थिए। कार्यक्रममा विद्यार्थीहरूले प्रस्तुत गरेका सांस्कृतिक तथा सांगीतिक प्रस्तुति दर्शकको आकर्षणको केन्द्र बनेका थिए।
कार्यक्रमका प्रमुख अतिथि तथा वडा अध्यक्ष सोनाम ग्याल्जेन शेर्पाले शिक्षालाई पाठ्यपुस्तकमा मात्र सीमित नराखी कला, संस्कृति, खेलकुद र अतिरिक्त क्रियाकलापसँग जोड्न आवश्यक रहेको बताउनुभयो। विद्यालय व्यवस्थापन समितिका अध्यक्ष छोङ्बा शेर्पाले यस्ता कार्यक्रमले विद्यालय र समुदायबीचको सम्बन्ध सुदृढ गर्नुका साथै विद्यार्थीको आत्मविश्वास बढाउने धारणा राख्नुभयो।
आयोजक विद्यालयका प्रधानाध्यापक कमल प्रसाद कार्कीले अतिरिक्त क्रियाकलापले विद्यार्थीको व्यक्तित्व विकासमा महत्वपूर्ण योगदान पुर्याउने बताउँदै आगामी दिनमा यस्ता कार्यक्रमलाई निरन्तरता दिइने जानकारी दिनुभयो। निर्णायकहरू केशव गिरी, गीता कार्की र सन्तोष ठकुन्नाले प्रतियोगिताले विद्यार्थीको प्रतिभा उजागर गर्न सहयोग पुग्ने बताएका थिए।
प्रतियोगिताको जुनियर नृत्यतर्फ गार्मा माध्यमिक विद्यालय प्रथम, सिद्धार्थ आधारभूत विद्यालय द्वितीय र सेकारसिंह आधारभूत विद्यालय तृतीय भएका थिए। सिनियर नृत्यतर्फ गार्मा माध्यमिक विद्यालय प्रथम र सगरमाथा माध्यमिक विद्यालय द्वितीय भएका थिए। सिनियर गायनतर्फ सगरमाथा माध्यमिक विद्यालयकी याङ्जी शेर्पा प्रथम र गार्मा माध्यमिक विद्यालयकी अनिशा खालिङ राई द्वितीय भएकी थिइन्।
सोलुदुधकुण्ड नगरपालिका वडा नं. ७, हिमालयन केयर फाउन्डेशन तथा सिटी भिलेज फाउन्डेशन, काठमाडौंको सहयोगमा सम्पन्न कार्यक्रमले विद्यार्थीबीच स्वस्थ प्रतिस्पर्धा, सांस्कृतिक चेतना र नेतृत्व क्षमताको विकासमा टेवा पुग्ने अपेक्षा गरिएको छ।
Discussion about this post