तेन्जिङको सम्झनामा लिड क्लाइम्बिङको इतिहास रचिँदै, १२ खेलाडी फाइनलमा

साेलुखुम्बु , जेठ १४ — विश्वप्रसिद्ध आरोही तेन्जिङ नोर्गे शेर्पाको साहसिक विरासतलाई सम्मान गर्दै आयोजित तेस्रो संस्करणको ‘तेन्जिङ नोर्गे शेर्पा ओपन लिड क्लाइम्बिङ प्रतियोगिता’ बिहीबारबाट काठमाडौंमा सुरु भएको छ। प्रतियोगिताको फाइनल चरणमा ६ पुरुष र ६ महिला गरी १२ खेलाडीले स्थान सुरक्षित गरेका छन्।

नेपाल राष्ट्रिय पर्वतारोहण पथप्रदर्शक संघ (एनएनएमजीए) र यूएस नेपाल क्लाइम्बर्स एसोसिएसन इन्कको संयुक्त आयोजनामा भइरहेको प्रतियोगितामा पुरुषतर्फ एक विदेशी खेलाडी समेत फाइनलमा प्रवेश गरेका छन्। प्रतियोगिताको मुख्य उद्देश्य नेपालमा साहसिक आरोहण खेलको विकास र प्रवर्द्धन गर्नुका साथै सगरमाथाका प्रथम आरोही तेन्जिङ नोर्गे शेर्पा तथा सर एड्मण्ड हिलारीको ऐतिहासिक योगदानलाई सम्मान गर्नु रहेको आयोजकले जनाएको छ।

प्रतियोगितामा प्रारम्भिक चरणमा २७ पुरुष र ११ महिला खेलाडी सहभागी भएका थिए। तीमध्ये उत्कृष्ट प्रदर्शनका आधारमा ६ पुरुष र ६ महिला खेलाडी फाइनलमा छनोट भएका हुन्।

नेपाल राष्ट्रिय पर्वतारोहण पथप्रदर्शक संघका अध्यक्ष तुलसिंह गुरुङ का अनुसार यस वर्षको प्रतियोगिता विशेष महत्वको छ। अघिल्ला दुई संस्करण टप–रोप क्लाइम्बिङमा सीमित रहे पनि यसपटक पहिलोपटक लिड क्लाइम्बिङ विधामा प्रतियोगिता सञ्चालन गरिएको छ।

प्रतियोगिताका विजेताले पुरुष तथा महिला दुवै विधामा क्रमशः प्रथम, द्वितीय र तृतीय स्थानका लागि ५० हजार, ३० हजार र २० हजार रुपैयाँ नगद पुरस्कार प्राप्त गर्नेछन्।

नेपाल पर्वतारोहण संघका अध्यक्ष फुर गेल्जे शेर्पा ले उद्घाटन गरेको प्रतियोगिताको फाइनल शुक्रबार हुनेछ। फाइनल कार्यक्रममा प्रतिनिधिसभा सदस्य मिङ्मा ग्याबु शेर्पा को विशेष उपस्थिति रहने जनाइएको छ।

सन् १९५३ मे २९ मा तेन्जिङ नोर्गे शेर्पा र सर एड्मण्ड हिलारीले विश्वको सर्वोच्च शिखर सगरमाथाको पहिलो सफल आरोहण गरेको ऐतिहासिक दिनको स्मरणमा आयोजना गरिएको प्रतियोगिताले नेपालमा विकसित हुँदै गएको क्लाइम्बिङ संस्कृतिलाई थप उचाइ दिने अपेक्षा गरिएको छ। आयोजकका अनुसार यसले युवा पुस्तालाई साहसिक खेल र पर्वतारोहणतर्फ आकर्षित गर्दै नेपालको पर्वतीय खेल पर्यटन प्रवर्द्धनमा समेत टेवा पुर्‍याउनेछ।