प्रहरी, पत्रकार र स्थानीयलाई निःशुल्क स्वास्थ्य परीक्षण तथा औषधि वितरण

जेठ १४, सोलुखुम्बु । कर्णाली प्रदेश प्रहरी अस्पतालको आयोजना, जिल्ला प्रहरी कार्यालय मुगु को समन्वय तथा जिल्ला अस्पताल मुगु को सहजीकरणमा प्रहरी, सञ्चारकर्मी तथा स्थानीय नागरिकका लागि निःशुल्क स्वास्थ्य परीक्षण तथा औषधि वितरण गरिएको छ। “प्रहरी युनिटसँग प्रहरी अस्पताल कार्यक्रम” अन्तर्गत बुधबार जिल्ला प्रहरी कार्यालय मुगुमा आयोजित स्वास्थ्य शिविरमा कर्णाली प्रदेश प्रहरी अस्पतालका विशेषज्ञ डाक्टर श्यामकृष्ण लौडारीसहितको टोलीले हाडजोर्नी, नसा, छाला लगायत विभिन्न रोगहरूको परीक्षण गरेको थियो।

स्वास्थ्य टोलीका सदस्य प्रहरी हवल्दार बिखृसिंह भण्डारीका अनुसार शिविरमा ९६ जना प्रहरी कर्मचारी, १० जना प्रहरी परिवार, सञ्चारकर्मी तथा २२ जना सर्वसाधारण गरी कुल १ सय २८ जनाको स्वास्थ्य परीक्षण गरिएको थियो।कार्यक्रमअन्तर्गत प्रहरी कर्मचारीहरूको स्वास्थ्य अवस्था, कार्यक्षेत्रमा उनीहरूले भोगिरहेका समस्या, खानपान तथा शारीरिक अवस्थाको परीक्षण गरिएको अस्पतालले जनाएको छ। साथै स्थानीय नागरिक, लोपोन्मुख समुदाय र विद्यार्थीहरूलाई स्वास्थ्य शिक्षा, रक्तचाप, सुगर लगायतका परीक्षण तथा स्वास्थ्यसम्बन्धी जनचेतनामूलक सन्देश पनि प्रदान गरिएको थियो। विशेषज्ञ डाक्टर श्यामकृष्ण लौडारीका अनुसार शिविरमा सहभागी अधिकांशमा ढाड, कम्मर, घाँटी तथा शरीरका विभिन्न जोर्नी र नसासम्बन्धी समस्या बढी देखिएको छ।

कर्णाली प्रदेश प्रहरी अस्पताल सुर्खेतबाट ५० प्रकारका औषधिसहित सञ्चालन गरिएको स्वास्थ्य अभियानअन्तर्गत जेठ १० गते जिल्ला प्रहरी कार्यालय कालिकोट मा १ सय १५ जना, जिल्ला प्रहरी कार्यालय जुम्ला मा १ सय २० जना तथा जेठ १२ गते जुम्लाको कनकासुन्दरी गाउँपालिका–८ स्थित पाण्डव गुफा स्वास्थ्य चौकीमा २ सय ९ जनाको स्वास्थ्य परीक्षण गरिएको थियो।

नेपाल पत्रकार महासंघ मुगु का अध्यक्ष अच्युतराज भण्डारीले जिल्ला अस्पतालमा सामान्य उपचारका लागि समेत शुल्क तिर्नुपर्ने अवस्था रहेको उल्लेख गर्दै कर्णाली प्रदेश प्रहरी अस्पतालबाट निःशुल्क स्वास्थ्य परीक्षण, परामर्श र औषधि पाउँदा नागरिकलाई ठूलो राहत पुगेको बताए।