सोलुखुम्बुमा नयाँ पर्यटकीय पदमार्ग शुभारम्भ, ‘मेरा एभरेस्ट ट्रेल’बाट पर्यटन प्रवर्द्धनको अपेक्षा

जेठ १५, साेलुखुम्बु ।  —   सोलुखुम्बुको महाकुलुङ क्षेत्रलाई नयाँ पर्यटकीय गन्तव्यका रूपमा स्थापित गर्ने उद्देश्यसहित ‘अपर मुन्दुम हुँगा भ्याली मेरा एभरेस्ट ट्रेल’ नामक नयाँ पदमार्ग औपचारिक रूपमा शुभारम्भ गरिएको छ। पर्यटन क्षेत्रका सरोकारवालाले यस पदमार्गले पदयात्रा पर्यटनमा नयाँ आकर्षण थप्ने विश्वास व्यक्त गरेका छन्।

नेपाल पर्यटन बोर्डमा बिहीबार आयोजित कार्यक्रममा प्रतिनिधिसभा सदस्य प्रकाश सिंह कार्कीको प्रमुख आतिथ्यमा पदमार्गको नक्सा, बुकलेट तथा प्रचार सामग्री सार्वजनिक गर्दै पदमार्ग शुभारम्भ भएको घोषणा गरिएको हो।

कार्यक्रममा प्रतिनिधिसभा सदस्यहरू रीना उप्रेती र गीता गुरुङ, कोशी प्रदेशसभा सदस्य बुद्धीकुमार राजभण्डारी, महाकुलुङ गाउँपालिकाका अध्यक्ष सूर्यबहादुर कुलुङ तथा उपाध्यक्ष विपना कुलुङलगायतको उपस्थिति रहेको थियो।

शुभारम्भ कार्यक्रममा पर्यटन व्यवसायी तथा विज्ञहरूले ‘अपर मुन्दुम हुँगा भ्याली मेरा एभरेस्ट ट्रेल’ ले सोलुखुम्बुको कम परिचित प्राकृतिक, सांस्कृतिक र हिमाली सम्पदालाई राष्ट्रिय तथा अन्तर्राष्ट्रिय पर्यटकीय बजारमा चिनाउन सहयोग पुग्ने धारणा राखेका थिए।

ट्रेकिङ एजेन्सिज एसोसिएसन अफ नेपाल (टान) का अध्यक्ष सागर पाण्डे र नेपाल पर्यटन बोर्डका निमित्त निर्देशक सुनिल शर्मालगायत वक्ताले पदमार्गको भविष्य सकारात्मक रहेको उल्लेख गर्दै यसको प्रभावकारी प्रवर्द्धन र पूर्वाधार विकासमा जोड दिएका थिए।

महाकुलुङ क्षेत्रको प्राकृतिक सौन्दर्य, स्थानीय संस्कृति तथा हिमाली दृश्यावलोकनलाई समेट्ने लक्ष्यसहित पहिचान गरिएको यो पदमार्गले स्थानीय पर्यटन, रोजगारी र आर्थिक गतिविधि विस्तारमा योगदान पुर्‍याउने अपेक्षा गरिएको छ। सम्बन्धित निकायहरूले पदमार्गलाई अन्तर्राष्ट्रिय पर्यटन बजारमा प्रवर्द्धन गर्ने तयारीसमेत अघि बढाएको बताएका छन्।