सबिना राई, जेठ १५, सोलुखुम्बु । सोलुखुम्बुमा कृषि कर्जामा ब्याज अनुदान परिचालन तथा जिल्ला स्तरका एग्रोभेट एवं विषादी व्यवसायीसँग अन्तक्रिया कार्यक्रम सम्पन्न भएको छ । शुक्रबार कृषि ज्ञान केन्द्र सोलुखुम्बुको आयोजनामा उक्त कार्यक्रम सम्पन्न गरिएको हो । कार्यक्रममा जिल्लाका एग्रोभेट तथा विषादी व्यवसायीहरूले कृषि कर्जा सम्बन्धी विभिन्न समस्या तथा चुनौतीहरू उठाएका थिए । सहभागीहरूले बैंकमार्फत कर्जा प्रवाह, ब्याजदर, प्रक्रियागत जटिलता लगायतका विषयमा आफ्ना अनुभव र गुनासो प्रस्तुत गरेका थिए । उठाइएका प्रश्नहरूको जवाफ सम्बन्धित बैंकका प्रतिनिधि लगायत कृषि ज्ञान केन्द्रका प्रमुख तथा प्रतिनिधिहरुले दिएका थिए ।
कार्यक्रमलाई सम्बोधन गर्दै जिल्ला समन्वय समितिका प्रमुख कृष्ण प्रसाद निरौलाले आफू पनि कृषक भएकाले वास्तविक किसानहरूको पहिचान गरी उनीहरूलाई लक्षित कार्यक्रम सञ्चालन गरिरहेको बताउनुभयो । उहाँले जिल्लाका किसानहरूले भोगिरहेका समस्याको समाधानका लागि समन्वय र सहकार्यलाई प्राथमिकता दिने प्रतिबद्धता व्यक्त गर्नुभयो । त्यसैगरी कृषि ज्ञान केन्द्र सोलुखुम्बुका प्रमुख दुर्गा बहादुर तिरुवाले मन्त्रालयमार्फत कृषि कर्जामा प्रदान गरिने ब्याज अनुदानबारे जानकारी दिनुभयो ।
उहाँका अनुसार बैंकमार्फत लगानी हुने कृषि कर्जामा मन्त्रालयले ६ प्रतिशतसम्म ब्याज अनुदान उपलब्ध गराउने व्यवस्था रहेको छ । यदि कुनै बैंकको कृषि कर्जाको ब्याजदर ६ प्रतिशतभन्दा कम भएमा सोही कायम ब्याजदर अनुसार अनुदान प्रदान गरिनेछ । उहाँले वित्तीय संस्थामार्फत प्रवाह हुने कृषि कर्जामा ७ प्रतिशतसम्म ब्याज अनुदान तथा सहकारीमार्फत लगानी हुने कर्जामा ८ प्रतिशत ब्याज अनुदान उपलब्ध गराइने जानकारी समेत दिनुभयो ।
कार्यक्रममा सहभागी एग्रोभेट तथा विषादी व्यवसायीहरूले खुलेर आफ्ना समस्या तथा सुझाव राखेका थिए। बागबानी केन्द्र फाप्लु कृषि ज्ञान केन्द्रका बाली संरक्षण अधिकृत प्रमेश्वर चमारले एग्रोभेट तथा विषादी व्यवस्थापन सम्बन्धी प्रस्तुतिकरण गर्नुभएको थियो ।
Discussion about this post