महिलाको आत्मविश्वास र अधिकार सुदृढ गर्न सल्लेरीमा ३ दिने प्रशिक्षण

सबिना राई, जेठ १५, सोलुखुम्बु । हिमाली जिल्ला सोलुखुम्बुमा महिलाहरुको क्षमता अभिवृद्धि तथा अधिकार सचेतना बढाउने उद्देश्यले मनोसामाजिक, स्व–हेरचाह तथा कानुनी सचेतना सम्बन्धी तीन दिने तालिम सम्पन्न भएको छ । सोलुदुधकुण्ड नगरपालिकाको आयोजनामा जेठ १३ गतेदेखि सुरु भएको तालिम शुक्रबार सम्पन्न भएको हो ।

जिल्ला समन्वय समितिको सभाहलमा सञ्चालन गरिएको तालिममा नगरपालिकाभित्रका ३७ जना महिलाहरु सहभागी भएका थिए । तालिममार्फत महिलाहरुलाई मानसिक स्वास्थ्य, तनाव व्यवस्थापन, आत्म–हेरचाह, महिला अधिकार, घरेलु हिंसा तथा कानुनी संरक्षण सम्बन्धी विषयमा जानकारी प्रदान गरिएको महिला तथा बालबालिका शाखाकी महिला विकास निरीक्षक रीता ढुङ्गानाले जानकारी दिनुभयो । उहाँका अनुसार तालिमको सहजीकरण रुपा भट्टराई, राधिका श्रेष्ठ, टंकीमाया बस्नेत, इन्दु बस्याल भण्डारी तथा अम्रिता कार्कीले गर्नुभएको थियो ।

सहभागीहरुले तालिम उपयोगी र व्यवहारिक भएको प्रतिक्रिया दिएका छन् । नगरपालिकाले महिलाहरुलाई आत्मविश्वासी, सचेत र मानसिक रुपमा सशक्त बनाउने उद्देश्यले यस्तो कार्यक्रम सञ्चालन गरिएको जनाएको छ । साथै, समाजमा हुने हिंसा, विभेद तथा अन्यायविरुद्ध महिलाहरुलाई कानुनी रुपमा सचेत बनाउँदै सुरक्षित र सम्मानित जीवनयापनमा सहयोग पुग्ने अपेक्षा गरिएको छ ।