सोलुखुम्बुमा बिहानै आगलागी, वृद्धाको घर जलेर नष्ट

जेठ २९, सोलुखुम्बु । सोलुखुम्बुको सोलुदुधकुण्ड नगरपालिका–४ टार खोलाघारीमा आगलागीबाट एक घर जलेर नष्ट भएको छ । जिल्ला प्रहरी कार्यालय सोलुखुम्बुका अनुसार शुक्रबार बिहान ७२ वर्षीया कान्छी तामाङ को ढुङ्गा–माटोले बनेको टिनको छानो भएको एकतले घरमा विद्युत् लाइन सर्ट भई आगलागी भएको हो। घटनाको जानकारी प्राप्त हुनासाथ प्रहरी टोली घटनास्थल पुगेको थियो।

प्रहरी, स्थानीय बासिन्दा तथा दमकलको संयुक्त प्रयासपछि आगो नियन्त्रणमा लिइएको प्रहरीले जनाएको छ। आगलागीबाट घरभित्र रहेको एक लाख ७० हजार रुपैयाँ नगद, डेढ तोला सुन, दुई थान चाँदीका बाला, अन्नपात, भाँडावर्तन, लत्ताकपडा तथा विभिन्न महत्त्वपूर्ण कागजात जलेर नष्ट भएका छन्। प्रहरीको प्रारम्भिक मूल्याङ्कनअनुसार आगलागीबाट करिब ६ लाख ५० हजार रुपैयाँ बराबरको भौतिक क्षति पुगेको छ। यद्यपि घटनामा कुनै मानवीय क्षति नभएको र घटनाबारे थप अनुसन्धान भइरहेको प्रहरीले जनाएको छ ।