सबिना राई, असार १०, सोलुखुम्बु । सोलुखुम्बुको सोलुदुधकुण्ड नगरपालिकाले आगामी आर्थिक वर्ष २०८३/०८४ का लागि ८५ करोड ९५ लाख २३ हजार ९ सय ९५ रुपैयाँको अनुमानित बजेट सार्वजनिक गरेको छ । बुधबार आयोजित नगरसभाको बैठकमा नगर उपप्रमुख गान्धिमाया तामाङले बजेट वक्तव्य प्रस्तुत गर्दै आगामी वर्षको आय–व्ययको अनुमानित विवरण तथा चालु आर्थिक वर्ष २०८२/०८३ को जेठ मसान्तसम्मको बजेट समीक्षा पेश गर्नुभयो ।
आगामी आर्थिक वर्षको प्रस्तुत बजेटअनुसार चालु खर्चतर्फ ५१ करोड १२ लाख २८ हजार ९ सय ९५ रुपैयाँ तथा पुँजीगत खर्चतर्फ ३४ करोड ८२ लाख ९५ हजार रुपैयाँ विनियोजन गरिएको छ । नगरपालिकाले आगामी वर्षको बजेटको मुख्य स्रोत संघीय सरकारबाट प्राप्त हुने समानीकरण अनुदान, राजस्व बाँडफाँट तथा सशर्त अनुदानलाई बनाएको छ ।
संघीय सरकारबाट ६३ करोड ७२ लाख ८६ हजार रुपैयाँ प्राप्त हुने अनुमान गरिएको छ भने प्रदेश सरकारबाट विभिन्न शीर्षकमा ६ करोड ३० लाख १७ हजार ४ सय ५३ रुपैयाँ प्राप्त हुने प्रक्षेपण गरिएको छ । आन्तरिक आम्दानीतर्फ नगरपालिकाले कर, शुल्क, दस्तुर तथा अन्य स्रोतबाट ८ करोड ५५ लाख २४ हजार रुपैयाँ संकलन गर्ने लक्ष्य राखेको छ । घरबहाल कर, व्यवसाय दर्ता तथा नवीकरण शुल्क, विभिन्न सिफारिस दस्तुर, न्यायिक दस्तुर तथा फोहोरमैला व्यवस्थापन शुल्कबाट उल्लेख्य आम्दानी हुने अपेक्षा गरिएको छ ।
त्यसैगरी संघीय राजस्व बाँडफाँटबाट ३ करोड ३० लाख ७६ हजार ३ सय ४२ रुपैयाँ र स्थानीय राजस्व बाँडफाँटबाट २ करोड ३५ लाख २० हजार रुपैयाँ प्राप्त हुने अनुमान गरिएको छ । आगामी आर्थिक वर्षका लागि २ करोड ७१ लाख रुपैयाँ बचत रहने प्रक्षेपण पनि गरिएको छ । चालु आर्थिक वर्षबाट बचत हुने रकमलाई समेत आगामी वर्षको स्रोतमा समावेश गरिएको नगरपालिकाले जनाएको छ ।
विनियोजन विधेयकमा नगर कार्यपालिका, वडा समिति तथा विषयगत शाखामार्फत सञ्चालन हुने विकास निर्माण, सेवा प्रवाह र प्रशासनिक गतिविधिका लागि बजेट खर्च गर्न सकिने व्यवस्था गरिएको छ । स्वीकृत शीर्षकभित्र आवश्यकता अनुसार रकम रकमान्तर गर्न सकिने भए पनि तोकिएको सीमाभन्दा बढी रकम सार्न नगरसभाको स्वीकृति आवश्यक पर्ने व्यवस्था गरिएको छ । नगरपालिकाले आगामी आर्थिक वर्षमा पूर्वाधार विकास, शिक्षा, स्वास्थ्य, कृषि, पर्यटन प्रवद्र्धन तथा आधारभूत सेवा सुधारलाई प्रमुख प्राथमिकतामा राख्दै विभिन्न कार्यक्रम सञ्चालन गर्ने जनाएको छ ।
Discussion about this post