सोलुखुम्बुमा सुर्तीजन्य पदार्थ, लागू पदार्थ तथा मदिरा नियन्त्रणसम्बन्धी अभिमुखीकरण कार्यक्रम

असार १७, सोलुखुम्बु । सोलुखुम्बुमा सुर्तीजन्य पदार्थ, लागू पदार्थ तथा मदिराको रोकथाम, नियन्त्रण तथा नियमनसम्बन्धी सरोकारवालाहरूसँग अभिमुखीकरण कार्यक्रम सम्पन्न भएको छ । स्वास्थ्य कार्यालय सोलुखुम्बुको आयोजनामा बुधबार सम्पन्न कार्यक्रममा स्वास्थ्य कार्यालय प्रमुख जीवन चौलागाईंले सुर्तीजन्य पदार्थ, लागू पदार्थ तथा मदिराको प्रयोग, त्यसका प्रकार, वर्तमान अवस्था तथा यसले व्यक्ति, परिवार र समाजमा पार्ने असरबारे प्रस्तुतीकरण गर्नुभएको थियो ।

कार्यक्रमको मुख्य उद्देश्य सुर्तीजन्य पदार्थ, लागू पदार्थ तथा मदिराको दुरुपयोगका कारण जनस्वास्थ्य, अर्थतन्त्र तथा सामाजिक जीवनमा पर्ने दीर्घकालीन नकारात्मक प्रभावबारे सरोकारवालाहरूलाई जानकारी गराउनुका साथै रोकथाम तथा नियन्त्रणका उपायबारे सचेतना अभिवृद्धि गर्नु रहेको आयोजकले जनाएको छ ।

अभिमुखीकरण कार्यक्रममा नेपाल रेडक्रस सोसाइटी सोलुखुम्बुका सभापति रामकाजी श्रेष्ठ, जिल्ला अस्पताल फाप्लुका कर्मचारी, विभिन्न स्वास्थ्यकर्मी, विद्यालय नर्स तथा सञ्चारकर्मीहरूको सहभागिता रहेको थियो । आयोजकका अनुसार यस्ता सचेतनामूलक कार्यक्रमले सुर्तीजन्य पदार्थ, लागू पदार्थ तथा मदिराको दुरुपयोग न्यूनीकरण गर्न तथा स्वस्थ समाज निर्माणमा सहयोग पुग्ने अपेक्षा गरिएको छ ।