सोलुखुम्बु, असार २० । सोलुखुम्बुको माप्यदूधकोशी गाउँपालिका–२ मा ६ हजार लिटर क्षमताको खानेपानी ट्याङ्की निर्माण भइरहेको छ। आयोजना सम्पन्न भएपछि वडाका करिब ४० देखि ६० घरधुरी प्रत्यक्ष रूपमा लाभान्वित हुने भएका छन् । वर्षायाममा पानीको पर्याप्त उपलब्धता भए पनि हिउँद सुरु भएसँगै खानेपानीको अभाव हुने समस्या समाधान गर्ने उद्देश्यले ट्याङ्की निर्माणको काम अघि बढाइएको हो।
स्थानीयवासीले हरेक वर्ष हिउँदमा भोग्दै आएको खानेपानी समस्यालाई मध्यनजर गर्दै योजना कार्यान्वयन गरिएको जनाइएको छ। निर्माण कार्यमा वडा अध्यक्ष चन्द्रबहादुर राईको पहल तथा समन्वय रहेको छ। स्थानीय जनप्रतिनिधि र समुदायको सहकार्यमा निर्माण भइरहेको उक्त आयोजना समयमै सम्पन्न भएपछि स्थानीय बासिन्दालाई स्वच्छ तथा नियमित खानेपानी उपलब्ध गराउन सहज हुने विश्वास गरिएको छ। स्थानीयवासीले खानेपानीजस्तो आधारभूत आवश्यकतासँग जोडिएको यो योजनाले हिउँदको समयमा वर्षौंदेखिको समस्या समाधान गर्न महत्वपूर्ण योगदान पुग्ने अपेक्षा गरेका छन्।
Discussion about this post