सोलुखुम्बुमा अन्तर निकायको संयुक्त अनुगमन, चार कृषि फार्मको अवस्था मूल्यांकन

असार २७, सोलुखुम्बु । सोलुखुम्बुमा चार वटा कृषि फार्मको अन्तरनिकायीय संयुक्त अनुगमन गरिएको छ । राष्ट्रिय कृषि आधुनिकीकरण कार्यक्रम, कार्यक्रम कार्यान्वयन इकाई ओखलढुंगा र सोलुखुम्बुको आयोजनामा शनिबार जिल्लाका विभिन्न सरकारी निकायका प्रतिनिधिहरूले संयुक्त रूपमा अनुगमन गरेका हुन् । आर्थिक वर्ष २०८२/०८३ को स्वीकृत कार्यक्रमअन्तर्गत आयोजित अनुगमन जिल्ला समन्वय समिति सोलुखुम्बुका प्रमुख कृष्णप्रसाद निरौलाको प्रमुख आतिथ्य तथा राष्ट्रिय कृषि आधुनिकीकरण कार्यक्रम, कार्यक्रम कार्यान्वयन इकाई ओखलढुंगाका भूमि वरिष्ठ अधिकृत हेमबहादुर आले मगरको अध्यक्षतामा सम्पन्न भएको हो ।

अनुगमनका क्रममा विगतका वर्षहरूमा कार्यालयबाट उपलब्ध गराइएका अनुदानका कृषि सामग्रीहरूको सदुपयोग तथा किसानहरूको कृषि उत्पादनको अवस्थाबारे स्थलगत रूपमा जानकारी लिइएको थियो । जिल्ला समन्वय समिति सोलुखुम्बुका प्रमुख कृष्णप्रसाद निरौलाले किसानहरूले प्राप्त अनुदानको सही सदुपयोग गरेको भन्दै प्रशंसा गर्नुभयो । किसानकै खेतबारीमा पुगेर उहाँले उनीहरूलाई खादामालाले सम्मानसमेत गर्नुभएको थियो ।

त्यसैगरी, सोलुदुधकुण्ड नगरपालिकाकी उपमेयर गान्धीमाया तामाङले राष्ट्रिय कृषि आधुनिकीकरण कार्यक्रमले नगर क्षेत्रका किसानहरूलाई महत्वपूर्ण सहयोग पु¥याएको भन्दै धन्यवाद व्यक्त गर्नुभयो। आगामी दिनमा पनि यस्ता कार्यक्रमलाई निरन्तरता दिँदै सहकार्यलाई थप प्रभावकारी बनाइने प्रतिबद्धता उहाँले व्यक्त गर्नुभयो ।

भूमि वरिष्ठ अधिकृत हेमबहादुर आले मगरले कार्यालयले विगतमा वितरण गरेको अनुदानको प्रभावकारिता अनुगमनका क्रममा सकारात्मक रूपमा देखिएको बताउनुभयो। वास्तविक किसानहरूको मेहनत र विश्वासलाई आधार मानेर अनुदान वितरण गरिएको उल्लेख गर्दै उहाँले अनुदानको सदुपयोग भएको पाइएको जानकारी दिनुभयो ।

अनुगमनमा सहभागी किसानहरूले विभिन्न निकायका प्रतिनिधिहरू आफ्नै खेतबारीमा पुग्दा आफूहरू अझ जिम्मेवार बनेको अनुभव सुनाए। साथै, अनुदानबाट प्राप्त कृषि सामग्रीलाई आगामी दिनमा पनि सुरक्षित र प्रभावकारी रूपमा प्रयोग गर्ने प्रतिबद्धता व्यक्त गरेका छन् । संयुक्त अनुगमनमा जिल्लास्थित विभिन्न सरकारी कार्यालय तथा सोलुदुधकुण्ड नगरपालिकाका प्रतिनिधिहरूको समेत सहभागिता रहेको थियो ।