सोलुखुम्बुका तीन स्थानीय तहमा शतप्रतिशत धान रोपाइँ सम्पन्न

सोलुखुम्बु, साउन ७ । हिमाली जिल्ला सोलुखुम्बुका तीन स्थानीय तहमा यस वर्ष धान रोपाइँ शतप्रतिशत सम्पन्न भएको छ । कृषि ज्ञान केन्द्र सोलुखुम्बुका अनुसार जिल्लाका आठ स्थानीय तहमध्ये महाकुलुङ, माप्य दूधकोशी र लिखुपिके गाउँपालिकामा धान रोपाइँ सत प्रतिशत सम्पन्न भएको हो ।

कार्यालयको तथ्याङ्कअनुसार सोलुदूधकुण्ड नगरपालिकामा ९० प्रतिशत, नेचासल्यान गाउँपालिकामा ७९ दशमलव १६ प्रतिशत, थुलुङ दूधकोशी गाउँपालिकामा ८० प्रतिशत तथा सोताङ गाउँपालिकामा ८७ दशमलव २७ प्रतिशत धान रोपाइँ सम्पन्न भएको छ । हालसम्म जिल्लाभर कुल ८४ दशमलव १६ प्रतिशत धान रोपाइँ सम्पन्न भएको कृषि ज्ञान केन्द्र सोलुखुम्बुका प्रमुख दुर्गा बहादुर तिरुवाले जानकारी दिनुभयो ।

उहाँका अनुसार जिल्लामा धान खेतीका लागि निर्धारण गरिएको एक हजार २ सय २५ हेक्टर क्षेत्रफलमध्ये एक हजार ३१ हेक्टरमा रोपाइँ सम्पन्न भइसकेको छ । हिमाली भूगोलका कारण खुम्बुपासाङल्हामु गाउँपालिकामा धान खेती नहुने कृषि ज्ञान केन्द्रले जनाएको छ ।